Marat Ahmetjanov: Aqmola oblysy – elimizdegi agrarlyq sektordyń júregi
ASTANA. KAZINFORM – «JańaDala/GreenDay 2024» kórmesin uıymdastyrý úshin Aqmola oblysynyń tańdalýy tegin emes. Atalǵan oblystyń sharýalary elimizdiń agroónerkásip kesheniniń damýyna ájeptáýir úles qosyp otyr.
Aqmola oblysy Aqkól aýdanyndaǵy «Eńbek» JShS egis dalasynda ótip jatqan dástúrli forýmnyń ashylý saltanatynda oblys ákimi Marat Ahmetjanov jergilikti aýyl sharýashylyǵy salasyndaǵy oń kórsetkishterdi tilge tıek etti.
Atap aıtsaq, 2023 jyldyń qorytyndysy boıynsha Aqmola oblysynyń taýar aınalymy 2 mlrd dollardy (950,5 mlrd teńge) quraǵan. Bul – 2022 jylmen salystyrǵanda 27% - ǵa artyq. 2023 jyly óńirdiń Frantsııamen syrtqy saýda aınalymy 2022 jylmen salystyrǵanda 23 ese ósip, 72 mln dollarǵa (34,2 mlrd teńge) jetti. Germanııamen saýda aınalymy 5 esege deıin ósip, 181 mln dollardy quraǵan (86 mlrd teńge).
«Búginde bizdiń oblys respýblıkanyń iri astyq egetin óńirleriniń biri bolyp tabylady. Aqmola oblysynda Qazaqstandaǵy barlyq qus etiniń 30% - y, taýyq jumyrtqasynyń 16% - y óndiriledi. Sondaı-aq bizdiń óńir azyq-túlik taýarlaryn óndirý boıynsha kóshbasshylardyń biri. Jýyrda AÓK baǵytynda jalpy somasy 130 mlrd teńgeden kem emes 79-dan astam iri ınvestıtsııalyq jobany iske asyrý josparlanyp otyr», - dedi oblys basshysy.
Aıta keteıik, jergilikti óndirýshilerdiń et jáne konservi ónimderi Reseı Federatsııasyna, QHR-ǵa, sút ónimderi RF-ǵa, un ónimderi jaqyn shet elderge (Qyrǵyzstan, Ózbekstan, Tájikstan, Aýǵanstan, QHR) jáne Birikken Arab Ámirlikterine eksporttalady
