Marapattalǵan memlekettik qyzmetshilerdiń úlesi 10 paıyzǵa da jetpeıdi – Dáýren Abaev

NUR-SULTAN. QazAqparat – QR Prezıdenti Ákimshiligi basshysynyń birinshi orynbasary Dáýren Abaev Táýelsizdik kúni qarsańynda marapat alǵandardyń ishinde memlekettik qyzmetshiler tym kóp boldy degen synaýshylarǵa jaýap berdi, dep habarlaıdy QazAqparat tilshisi.

«Marapat alǵandardyń ishinde memlekettik qyzmetkerler kóp degen stereotıpke qarsy mynany aıtqym keledi. Menińshe, marapat alǵandardyń arasynda memlekettik qyzmetshilerdiń úlesi 10 paıyzdan da az shyǵar. Negizi olardyń qaı-qaısysy da marapatqa laıyq edi. Memlekettik qyzmetshiler únemi eldiń kóz aldynda. Sondyqtan da solardy ǵana marapattap jatqandaı kórinetin shyǵar. Biraq bul olaı emes. Taǵy da qaıtalap aıtaıyn, 10 paıyzǵa de jetpeıdi», - dedi ol «Ashyq dıalog» suhbatynda.

Sondaı-aq, ol medal taǵyp, orden syılaý tájirıbesi eskiliktiń sarqyny deıtinderge de jaýap qatty.

«Bıyl marapat jyldaǵydan kóp boldy degenmen kelisemin. Biraq Táýelsizdiktiń 30 jyldyǵyn kúnde toılap jatqan joqpyz ǵoı. Anahronızm degenge kelsek, qurmetti ataqtar men ordender, medaldar tabystaý praktıkasy bizdiń ǵana biregeı dástúrimiz emes. Búkil órkenıetti álemde ondaı tájirıbe bar. Bul adamdardy yntalandyryp, óskeleń býynǵa úlgi etý úshin, eńbeksúıgishtikti, patrıottyq pen qoǵamǵa qyzmetti nasıhattaý úshin jasalady. Mundaı tájirıbeniń eshbir jaman jaǵy joq. Kerisinshe shyǵar», - dedi Dáýren Abaev.