Marapat kerek bolsa, 25 myń tóleńiz: Daryndy oqýshylar olımpıadasynan shý shyqty
ASTANA. KAZINFORM – Áleýmettik jelilerde «Daryndy 1000 bala» respýblıkalyq daryndy oqýshylar baıqaýyna qatysty shý shyqty. Uıymdastyrýshylar baıqaýdyń ekinshi kezeńine joldama alǵan balalardan 25 myń teńge jarna talap etken.
Qarajat aýdarǵandarǵa «Qazaqstan daryny» atty tósbelgishe, tósebelgisheni kýálandyratyn kýálik, respýblıkalyq I, II, III dárejeli dıplom, oqýshynyń jetekshisine jáne ata-anasyna qoldaý kórsetkeni úshin alǵys hat beriledi dep jazylǵan.
Buǵan Astana qalasynda ótetin marapattaý keshine elimizdiń shalǵaı aýyldarynan keletin balalardyń jol aqysyn qosyńyz.
Túptep kelgende, aqshasy barlar tósbelgi taǵady, qarajaty joqtar marapattan qaǵylady degen sóz.
Osyǵan oraı Oqý-aǵartý mınıstrliginiń baspasóz qyzmeti agenttik tilshisine resmı jaýap berdi.
Oǵan sensek, búginde elimizde resmı túrde aýyl oqýshylaryna arnalǵan mynadaı olımpıadalar bar:
- aýyl mektepteriniń 9-11(12) synyp oqýshylaryna arnalǵan jalpy bilim beretin pánder boıynsha respýblıkalyq olımpıada
- aýyl mektepterine arnalǵan «Myń bala» ulttyq zııatkerlik olımpıadasy
- IQanat Olımpıadasy.
— Bul olımpıadalar tegin. Atalǵan aýyl oqýshylary arasyndaǵy «Daryndy 1000 bala» olımpıadasy № 514 buıryqqa enbegen jáne resmı is-shara emes ekenin habarlaımyz. Oblystyq bilim basqarmalaryna muǵalimder men ata-analarǵa túsindirý jumysyn júrgizý tapsyryldy. Sondaı-aq, «Daryn» RǴPO osy kompanııanyń aldaǵy qyzmeti týraly quqyq qorǵaý organdaryna habarlasyp, tıisti shara qabyldaıtyn bolady, — delingen resmı aqparatta.
Sońǵy kezde bilim salasynda osyndaı aqyly baıqaýlar qaptap ketkeni jasyryn emes. Aqsha aýdarǵandardyń bári júldesiz qalmaı, elektrondy alǵys hat joldanady.
