Maran Homer tankerine shabýyl: QR Energetıka mınıstrligi oqıǵaǵa qatysty túsinikteme berdi
ASTANA. KAZINFORM – Qazaqstan munaıyn alýǵa bara jatqan grek tankeri Maran Homer Novorossıısk mańyndaǵy Kaspıı qubyr konsortsıýmynyń (KQK) termınaly mańynda belgisiz zattan zaqymdaldy. Qazaqstannyń Energetıka mınıstrligi oqıǵa kezinde kemede qazaqstandyq munaı bolmaǵanyn málimdedi.
Reuters agenttiginiń habarlaýynsha, oqıǵa 14 naýryz kúni tańerteń jergilikti ýaqyt boıynsha shamamen tańǵy saǵat 4:35-te bolǵan. Grekııa týy bar tanker Kaspıı qubyr konsortsıýmynyń (KQK) termınalyna kirý týraly nusqaýlardy kútip otyrǵan, onda ol qazaqstandyq munaıdy tıeýge tıis bolǵan.
Keme operatory Maran Tankers kompanııasynyń málimetinshe, soqtyǵysý kemeniń palýbasy men jabdyqtaryna azdaǵan zaqym keltirgen. Ekıpaj músheleri arasynda eshkim jaraqat alǵan joq, barlyq ekıpaj músheleri aman-esen. Oqıǵadan keıin tanker Novorossıısk aımaǵynan shyǵyp ketti.
QR Energetıka mınıstrligi oqıǵa kezinde tankerde qazaqstandyq munaı bolmaǵanyn naqtylady.
– Qazaqstan Respýblıkasy Energetıka mınıstrligi Novorossıısk akvatorııasynda «Maran Homer» tankerine qatysty oryn alǵan oqıǵaǵa baılanysty tómendegini habarlaıdy. Mınıstrliktiń málimetinshe, oqıǵa kezinde atalǵan tanker bortynda Qazaqstan Respýblıkasyna tıesili munaı bolmaǵan. Osyǵan baılanysty Qazaqstannyń eksporttyq munaıyna qatysty shyǵyn tirkelgen joq, - dedi mınıstrdiń keńesshisi – Qazaqstan Energetıka mınıstrliginiń resmı ókili Ásel Serikpaeva.
