Maraldydaǵy altyn fabrıkasy: departament táýelsiz komıssııa qurýǵa daıyn

ASTANA. QazAqparat – Shyǵys Qazaqstan oblysy Kúrshim aýdanyndaǵy Maraldy aýylynyń turǵyndary kótergen ekologııalyq dabylǵa baılanysty táýelsiz saraptama jasalady. Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Qazirgi tańda halyqtyń narazy ustanymyn eskerip, jergilikti ekologııa departamenti táýelsiz saraptamalyq komıssııa qurýǵa daıyn. Departament osyndaı ótinishpen Qazaqstan ekologııalyq aýdıtorlar qaýymdastyǵyna jáne Shyǵys Qazaqstan oblystyq ákimdigine júgindi», - dedi spıker.

Onyń aıtýynsha saraptamanyń maqsaty – qoǵamdyq ekologııalyq saraptama júrgizý.

«Saraptamaǵa kommertsııalyq emes uıymdar men qajetti deńgeıdegi kásibı daıyndyǵy bar tulǵalar tartylmaq. Qaýymdastyq ekologııalyq saraptamany uıymdastyrýshy retinde qatysýǵa daıyn. Qazir turǵyndardyń jaýabyn kútip otyrmyz. Búgingi tańda bul másele keńinen talqylanyp jatyr.

Kásiporyn altyn arshýǵa kirisip ketti. Jyl sońyna deıin tájirıbelik-ónerkásiptik óndiris júredi. Komıtettiń qaraýynda atalǵan karerden altyn alýdyń naqty jobasy bar.

Qoǵamdyq tyńdaýlar ótip qoıǵanyn, sol tyńdaý boıynsha oń sheshim qabyldanǵanyn aıtqym keledi. Qoǵam tarapynan qoıylyp jatqan suraqtar tikeleı jobaǵa qatysty bolýy kerek. Ekologııalyq kodeks pen qoǵamdyq tyńdaý ótkizý erejesi boıynsha jobaǵa qatysy joq máselelerdi biz qaramaımyz. Qazirgi ahýal osyndaı», - dedi Aıdar Abdýıalıev.