Maraldyda altyn óndirý fabrıkasyn salyp jatqan kompanııaǵa 3 mln teńgege jýyq aıyppul salyndy
Byltyr Shyǵys Qazaqstan oblysy Kúrshim aýdany Maraldy aýylynyń halqy altyn óndirýshi kompanııanyń jumysyna narazylyq bildirip, ekologııanyń buzylyp jatqandyǵyna shaǵymdanǵan. Al aýyldyń bir top belsendisi kerisinshe, sol kompanııany qoldap, zańsyz altyn qazýshylardyń bar ekendigin aıtyp, Prezıdentke hat jazǵan edi.
Ekologııa jáne tabıǵı resýrstar mınıstrliginiń ókili ortalyq kommýnıkatsııalar qyzmetinde ótken brıfıngide Maraldy altyn kenishi týraly birneshe suraqqa jaýap bergen.
ShQO ákimi Maraldydaǵy altyn kenishiniń daýly máselesi zań sheńberinde ǵana sheshilýi tıistigin málim etken.
Fabrıka qurylysy eki jylǵa jýyq ýaqyttan beri júrip jatyr. Jergilikti turǵyndar óndiriste tsıanıd qoldanylatynyna narazy. Olardyń pikirinshe, tsıanıd sýǵa tússe, aýmaqty ýlaıdy. Metallýrgter kerisinshe, jańa fabrıkanyń múldem qaýipsiz jáne tabıǵatqa eshqandaı qaýip tóndirmeıtinin jetkizýde. Qoǵamdyq tyńdaýlar esh nátıjesiz boldy. Ár tarap óz kózqarasynda qaldy.
ShQO Ekologııa departamenti atalǵan aýylda altyn fabrıkasyn salyp jatqan «VSAM Production» JShS-ne qatysty tekserý júrgizdi. Sonyń nátıjesinde birqatar zańbuzýshylyq anyqtaldy.
«Tekserý jumystary 3 aptadan astam ýaqytqa sozyldy. Kásiporynnyń qorshaǵan ortaǵa áserdi baǵalaý nátıjeleri boıynsha memlekettik ekologııalyq saraptama qorytyndysynyń talaptaryn saqtamaǵany anyqtaldy. Sondaı-aq jabdyqtalmaǵan ýchaskelerde óndiristik qaldyqtar saqtalǵan. Sol qaldyqtarmen jumys isteý talaptary buzylǵan. Jerdiń munaı ónimderimen lastaný faktileri de tirkeldi», - dep habarlady departamenttiń baspasóz qyzmeti.
Ekologtar tekserýden soń 5 ákimshilik is qozǵady. Kompanııaǵa 3 mln teńgege jýyq aıyppul salyndy.
