Maraldy turǵyndary Prezıdentke úndeý joldady: Zańsyz altyn qazýshylardy júgendeý kerek

ÓSKEMEN. QazAqparat – Shyǵys Qazaqstan oblysy Kúrshim aýdany Maraldy aýylynyń halqy zańsyz altyn qazýshylarǵa narazylyq bildirip, Prezıdentke hat jazdy, dep habarlaıdy QazAqparat tilshisi.

Aýdan ortalyǵynan 90 shaqyrymdaı jerde ornalasqan Maraldy aýylynda altyn ken orny bar. Sol jerlerde tabysqa kenelý úshin zańsyz altyn qazatyndarǵa jergilikti jurt narazy. Olar óz aryzdaryn Prezıdent Qasym-Jomart Toqaevqa joldady.

«Biz Maraldy aýylynyń turǵyndary, aýyldyq okrýgimizdiń aýmaǵynda zańdy negizde jumys istep jatqan jeke kásipker men zańsyz jolmen altyn qazýmen aınalysatyn qylmyskerlerdiń múddeleri teketireske túsken qazirgi jaǵdaıdyń qurbany bolyp otyrmyz. Sebebi altyn ken orny dál bizdiń aýylda ornalasqan. Buryn munda altyn óndirýmen tek zańdy belden basqandar ǵana aınalysatyny eshkimge de jasyryn emes edi. Al aýdanymyz buryn-sońdy damyǵan aýdandardyń qatarynan kóringen emes, aýyl turǵyndaryna jumys jetispeı keldi. Alaıda munda bizdi jaqsy múmkindiktermen qamtamasyz ete alatyn altyn óndirýshi kompanııa kele salysymen onyń qyzmetine jergilikti qylmyskerler qarsylyq kórsetti.

Altyn óndirýshi kompanııa barlyq tıisti protsedýralardy oryndap, zańdy túrde jumys isteı bastady. Birqatar qoǵamdyq tyńdaý ótkizilip, sonda taraptardyń mindettemeleri, qorshaǵan ortaǵa zııan keltirmeý jónindegi basqa da kepildikter anyq kórsetildi. Zańǵa sáıkes, altyn óndiretin fabrıka salý úshin jer tańdaldy. Bir sózben aıtqanda, zańnyń barlyq talaptary saqtaldy», - delingen hatta.

Maraldylyqtardyń sózinshe, kórsetilgen jumys jospary boıynsha kompanııa fabrıka qurylysy kezinde 220, al paıdalaný kezinde 110 jumys ornyn ashýǵa mindettendi. 2027 jylǵa deıin kelisimshart talaptary boıynsha bıýdjetke tólenetin mindetti tólemder 144 mıllıon teńgeni quraýy tıis dep bekitildi.

«Sonymen qatar kompanııa bizdiń aýdannyń áleýmettik ınfraqurylymyn damytýǵa ınvestıtsııa quıýǵa mindettendi. Osylaısha, qarapaıym aýyl turǵyndarynyń ómiri kúrt ózgerip, árbir otbasy laıyqty turaqty tabysqa keneler edi. Kompanııa aýylda 3 uńǵyma burǵylap úlgerdi. 2022-2029 jyldary aralyǵynda Kúrshim aýdanynyń jurtshylyǵyna 438 mıllıon teńge kóleminde áleýmettik kómek kórsetý josparlanýda. Kásipkerler qazirdiń ózinde jergilikti joldardy retke keltirýmen aınalysyp, óńirdegi qaıyrymdylyq sharalarǵa belsene qatysýda. Biraq fabrıkanyń salynýy zańsyz altyn qazýshylarǵa qajet emes. Olar tabystarynan aıyrylyp qalmas úshin kompanııanyń zańdy jumysyna qarsylyq tanytýda», - dep jazylǵan hatta.

Hat sońynda aýyl turǵyndary Przeıdentten osy máseleni sheshýge kómektesýdi suraıdy.