Maraldy kóliniń jaǵasynda kıiz úı qalashyǵy boı kóteredi
PAVLODAR. QazAqparat - Investorlar Maraldy kóliniń jaǵasynda kıiz úı qalashyǵyn salmaq. Bul týraly agenttikke Sharbaqty aýdany ákiminiń orynbasary Hasar Qabylbekov málim etti, dep habarlaıdy pavlodarnews.kz.
«Qazirgi kezde bıýdjet esebinen Pavlodar - Sharbaqty tasjolynan Kólbulaq aýylyna deıin 4,7 shaqyrym jol salynýda. Al Kólbulaq aýylynan kóldiń basyna deıin 2,7 shaqyrym qashyqtyqqa toq jelisi tartylyp jatyr», - dedi ákimniń orynbasary.
Hasar Qabylbekovtyń aıtýynsha, demalysqa arnalǵan ózge jumystardy ınvestorlar atqarýda. Kelgen qonaqtar demalatyn kıiz úı qalashyǵy salynbaq. Sondaı-aq akvapark salý da josparlanyp otyr. Jaǵajaı aýmaǵy keńeıtiledi. «Óıtkeni ótken jyly kelýshiler sany artyp jaǵajaı tarlyq etken bolatyn. Bıyl odan da kóp adam keledi dep kútilýde. Oǵan qosa, byltyrǵy jyly aıaqtalmaǵan jumystar aıaqtalady. Bárin de shomylý maýsymy bastalǵansha bitirýdi josparlap otyrmyz. Sonymen qatar, ınvestor bolashaqta sanatorııa ashý maqsatynda byltyrǵy jyly 65 maral ákelgen bolatyn. Búgingi tańda maraldar tóldep jatyr», - deıdi Hasar Qabylbekov.
Aıta keteıik, ótken jyly Maraldy kóline kelýshiler sany kúnine 3000-nan asqan.
