Maraldy halqynyń muńy: Altyn óndirý fabrıkasy qurylysyna tekserý júrgiziledi

ASTANA. QazAqparat – Osy aıda Shyǵys Qazaqstan oblysyna qarasty Maraldy aýylynyń tusynda salynyp jatqan altyn óndirý fabrıkasy qurylysyna tekserý júrgiziledi. Bul jaıynda Indýstrııa jáne ınfraqurylymdyq damý mınıstri Marat Qarabaev atalǵan aýyl turǵyndarynyń atynan kelgen bir top elordalyqpen kezdesýde aıtty, dep habarlaıdy QazAqparat tilshisi.

Mınıstrmen kezdesýge qatysqan Gúlgúl Isınanyń aıtýynsha, bolashaq fabrıka Maraldy ózeniniń janynda ornalasqan.

«Bul keıinnen jergilikti turǵyndardyń densaýlyǵyna jáne osy jerdegi tabıǵı qoryqqa keri áserin tıgizýi múmkin», - dedi ol.

Osy oraı Marat Qarabaev mınıstrlikte arnaýly komıssııa qurylǵanyn jáne shildeniń ekinshi jartysynda múddeli memlekettik organdardyń qatysýymen jergilikti jerge baryp, tekserý júrgiziletindigin atap ótti. Qandaı da bir zań buzýshylyq anyqtalyp, ol ýaqtyly joıylmaǵan jaǵdaıda tıisti is-sharalar qabyldanbaq.

«Birinshiden, barlyq qurylys joba boıynsha qoǵamdyq tyńdaýlar ótkizý mindetti bolyp sanalady. Tıisinshe, bul jaǵdaıda altyn óndirý kezeńine kóshý barysynda qoǵamdyq tyńdaýlar da ótkizilýi kerek. Ekinshiden, shildeniń ekinshi jartysynda múddeli memlekettik organdardyń qatysýymen tekserýler júzege asyrylady. Úshinshiden, jumystar ekologııalyq qaýipsizdiktiń barlyq normasyn saqtaı otyryp júrgizilýge tıis. Bul talaptardy eshkim joqqa shyǵarmaıdy. Tutastaı, osy kezeńde kompanııa tek geologııalyq-barlaý jumystarymen aınalysýǵa tıis», - dedi Marat Kárimjanuly.

Vedomstvo málimetinshe, atalǵan fabrıkanyń qurylysy jergilikti turǵyndardyń qatysýymen bolatyn qoǵamdyq tyńdaýlardyń qorytyndylary boıynsha jáne quzyretti organdardyń ruqsatyna sáıkes oń nátıje alynǵannan keıin ǵana iske asyrylady.

Buǵan deıin Shyǵys Qazaqstan oblysy Kúrshim aýdany Maraldy aýylynyń halqy altyn óndirý fabrıkasynyń qurylysyna qarsylyq tanytqanyn jazǵan edik.

Osydan keıin BAQ ókilderiniń saýalyna jaýap bergen Indýstrııa mınıstri bul másele 15 mamyrǵa deıin sheshiletindigin málimdegen bolatyn.

Biraq, másele áli sheshilgen joq.

Al Ekologııa jáne tabıǵı resýrstar mınıstri Zúlfııa Súleımenova Maraldydaǵy altyn óndirisine ruqsat berilmegendigin aıtady.