Maraldyda topyraq pen sýdan qaýipti ınfektsııalar men tsıanıd tabylmady

ÓSKEMEN. KAZINFORM - Shyǵys Qazaqstan oblysy Kúrshim aýdany Maraldy aýylynda 8 mal ólimine baılanysty júrgizilgen zertteýlerdiń alǵashqy nátıjesi shyqty.

Topyraq pen sýdan alynǵan synamalarǵa júrgizilgen zerthanalyq taldaýlar asa qaýipti juqpaly aýrýlar men ýytty zattardyń joqtyǵyn kórsetti.

- Ulttyq saraptama ortalyǵynyń akkredıttelgen zerthanasyndaǵy zertteýler nátıjesinde leptospıroz, psevdotýberkýlez, ıersınıoz, sibir jarasy men tsıanıd tabylmady. Al pasterellez ben týlıaremııaǵa qatysty synamalar áli zerttelip jatyr. Olardyń qorytyndysy 4 qazanǵa deıin daıyn bolady, - dep habarlady ShQO Sanıtarlyq-epıdemıologııalyq baqylaý departamentinen.

Buǵan deıin jergilikti turǵyndar aýyl mańyndaǵy altyn fabrıkasynyń zııany bolýy múmkindigine kúdiktengen bolatyn. Osy oraıda, mamandar topyraqtan 9, bulaq sýynan 2 synama alyp, mal ólekselerinen bıomaterıal jınaǵan.

Óńirlik veterınarlyq qyzmet ókilderi de bıologııalyq synama alyp, zertteýge jibergen.

Mal ólekseleri joıylyp, aýmaq zararsyzdandyrylyp, sharýashylyqtardy tekserý men malǵa vaktsına egý jumystary júrgizildi.

Oblys ákimdiginiń málimetinshe, aýylda basqa faktiler tirkelmegen.

Eske sala keteıik, buǵan deıin ShQO Kúrshim aýdanynda 8 mal ólimi tirkelip, onyń sebebi anyqtalyp jatqany habarlanǵan.