Maraldyda maldyń qyrylý sebebi áli anyqtalǵan joq

ASTANA. KAZINFORM – Shyǵys Qazaqstan oblysynyń Kúrshim aýdanyna qarasty Maraldy aýylynda segiz iri qaranyń qyrylýyna baılanysty júrgizilgen zertteýler aıaqtaldy.

Oblystyq veterınarııa basqarmasynyń málimetinshe, zerthanalyq taldaýlar nátıjesinde juqpaly aýrýlar men ýly zattardyń belgileri anyqtalǵan joq, alaıda mamandar maldyń óliminiń naqty sebebin anyqtaý jumystaryn jalǵastyryp jatyr.

Oblys ákiminiń tapsyrmasy boıynsha óńirde jedel jumys toby qurylyp, oqıǵa ornyna baryp, sý, topyraq jáne bıomaterıal úlgilerin alǵan. Sonymen qatar dezınfektsııa jáne maldardy vaktsınatsııalaý jumystary júrgizilgen.

Zertteý qorytyndysyna sáıkes, ammonıı, munaı ónimderi, tsıanıdter jáne aýyr metaldar boıynsha shekti ruqsat etilgen normadan asý derekteri tirkelmegen.

– Saraptama nátıjesinde sibir jarasy, pasterellez jáne qarasan sııaqty asa qaýipti aýrýlardyń belgileri anyqtalǵan joq. Toksıkologııalyq zertteý de ýlaný izderin kórsetken joq. Tek natrıı hlorıdiniń deńgeıi shamaly joǵary bolǵany baıqaldy, – dedi Maraldy aýylynda ótken kezdesý barysynda ShQO veterınarııa basqarmasynyń basshysy Ramıl Sagandykov.

Onyń aıtýynsha, zertteý jumystary jalǵasyp jatyr. Mamandar jem-shóp, sý jáne topyraq quramyn qosymsha tekserip, barlyq yqtımal faktorlardy anyqtaıdy. Uqsas zerthanalyq synamalar Úlken-Naryn aýdanynyń Balǵyn jáne Kókterek aýyldarynda da júrgizilmek.

Qazirgi tańda Maraldydaǵy epızootııalyq jaǵdaı turaqty dep baǵalanyp otyr. Jańa mal ólimi tirkelmegen. Veterınarlar kún saıyn maldyń jaǵdaıyn baqylap, jaıylym men sýattan qosymsha synamalar alyp otyrady.

Osylaısha, juqpaly aýrý nemese hımııalyq ýlaný nusqasy rastalǵan joq, degenmen maldyń qyrylýyna sebep bolǵan naqty faktor ázirge anyqtalmady.

Buǵan deıin ShQO ekologtary halyq shaǵymynan soń Maraldy aýylyndaǵy aýa sapasyn tekseretinin jazǵanbyz.