SQO-da jer komıssııasy ýchaskelerdi berý kezinde zań buzǵan
PETROPAVL. KAZINFORM – Soltústik Qazaqstan oblysy Ýálıhanov aýdanynda jerdi jalǵa berý kezinde komıssııa músheleri ádiletsizdik tanytyp, keı sharýashylyqtardyń múddesin negizsiz joǵary qoıǵan.
Memlekettik qyzmet isteri agenttiginiń SQO boıynsha departamentiniń málimetinshe, komıssııa quramyna Ýálıhanov aýdanyndaǵy jer qatynastary, kásipkerlik, aýyl sharýashylyǵy jáne veterınarııa bólimderiniń basshylary, sáýlet jáne qurylys bóliminiń basshy orynbasary, sondaı-aq Aqbulaq, Amangeldi, Aqtúıesaı, Qaratal, Teljan, Kishkenekól jáne Qaırat aýyldyq okrýgteriniń ákimderi engen. Oblystyq mamandandyrylǵan aýdanaralyq ákimshilik sot shyǵarǵan jeke uıǵarym negizinde olarǵa qatysty qyzmettik tergep-tekserý júrgizildi.
Tekserý barysynda jer ýchaskelerin uzaq merzimdi paıdalanýǵa berý konkýrsyn ótkizý kezinde zań talaptarynyń saqtalmaǵany anyqtaldy.
Máselen, konkýrsqa qatysýshylardyń ótinimderin baǵalaý kezinde aýyl sharýashylyǵy salasyndaǵy bilikti mamandardyń bolýyna beriletin ball birkelki eseptelmegen. Máselen, «Kereı» sharýa qojalyǵy men «AB Trade» sharýa qojalyǵynyń ótinimderindegi veterınarııa mamandarynyń dıplomdary esepke alynyp, árqaısysyna 10 baldan berilgen. Al «Jasulan» sharýa qojalyǵynyń ótiniminde kórsetilgen dál osyndaı maman baǵalaý kezinde eskerilmegen.
- «Jasulan» sharýa qojalyǵy sotqa berip, onyń talap-aryzy qanaǵattandyryldy. Daýly sheshim zańsyz dep tanyldy. Qyzmettik tergep-tekserý aıasynda komıssııa múshelerinen túsiniktemeler alynyp, olar óz kinálaryn moıyndady. Tekserý qorytyndysy boıynsha olardyń áreketterinen memlekettik qyzmetke nuqsan keltiretin tártiptik teris qylyq belgileri anyqtaldy, - deıdi departamenttiń bas mamany Araı Karınova.
Osyǵan baılanysty Ádep jónindegi keńes Ýálıhanov aýdanynyń ákimine jer komıssııasynyń múshelerine tártiptik jaza qoldanýdy usyndy.
Ýálıhanov aýdandyq ákimdiginiń málimetinshe, komıssııa músheleri – barlyq on memlekettik qyzmetshige «Qyzmetine tolyq sáıkes emestigi týraly eskertý» túrindegi tártiptik jaza qoldanyldy.
Buǵan deıin memlekettik qyzmetshilerge jańa etıkalyq standarttar engiziletinin jazǵan edik.
