Marafonshy Janna Mamajanova 35 jyldan keıin el rekordyn jańartty

NUR-SULTAN. QazAqparat – Nıderlandyda ótken Rotterdam marafonynda otandasymyz Janna Mamajanova Qazaqstan rekordyn jańartty. Sońǵy ret rekordtyq kórsetkishti 1987 jyly Tokıoda Zoıa Ivanova ornatqan, dep habarlaıdy QazAqparat QR Mádenıet jáne sport mınıstrligine silteme jasap.

KSRO Eńbek sińirgen sport sheberi Zoıa Ivanovanyń ol kezdegi kórsetkishi - 2:27:57 bolǵan. Al, Janna Mamajanova 42 shaqyrym 195 metr qashyqtyqty 2:26:54 ýaqytta kesip, Rotterdam marafonynyń qola júldesin jeńip aldy.

«Marafon oıdaǵydaı ótti. Júgirý barysynda qarqyndy birqalypty ustaýǵa tyrystym. Qazaqstan rekordyn jańartýdy aldyn ala josparladym. Ol úshin maǵan árbir shaqyrymdy 3:30 mınýtta ótý kerek boldy. Júgirip kele jatyp, áıelder arasynda shamamen «top-8», «top-7» qatarynda bolatyn shyǵarmyn dep oıladym. Biraq, sońǵy shaqyrymdarda kenııalyq eki qyzdy baıqadym. Máreni keskende de ózimniń úshinshi bolyp kelgenimdi bilmedim. Men úshin bastysy, iri halyqaralyq dodada el rekordyn jańartý boldy», - deıdi qazaqstandyq jelaıaq Janna Mamajanova.

Bul marafon 1981 jyldan beri dástúrli túrde ótedi. Álemniń úzdik on marafony qataryna kiredi. Bıyl onda 13 myńnan asa atlet baq synaǵan.

Janna Mamajanova - QR Qorǵanys mınıstrligi Ortalyq sport klýbynyń sportshysy. Vedomstvo málimetinshe, Rotterdamdaǵy jetistigi sportshyǵa 15-24 shilde aralyǵynda Oregonda (AQSh) ótetin jeńil atletıkadan álem chempıonatyna qatysýǵa múmkindik berdi.

Aıta keteıik, elimizde qazir sport ınfraqurylymyn damytýdyń 2025 jylǵa deıingi kestesi ázirlenip jatyr.