Marafonshy VII qysqy Azııa oıyndary astanalarynyń arasyn jaıaý júgirip ótti
ASTANA. Qazannyń 25-i. QazAqparat /Jasulan Amanbaıuly/ - Marafonshy Dýlat Imanqajy búgin óziniń belgilegen mejesi - Astanaǵa kelip jetti. Qazannyń 7-si kúni Almaty qalasynan jolǵa shyqqan ol, marafondyq júgirisin VII qysqy Azııa oıyndarynyń qurmetine jáne Qazaqstan Táýelsizdiginiń 20 jyldyǵyna arnaǵan.
D. Imanqajyǵa Azııa oıyndaryn uıymdastyrý komıteti dırektsııasy, sonymen qatar ózi múshesi bolyp tabylatyn Almatynyń marafonshylar klýby qoldaý kórsetken. VII-shi qysqy Azııa oıyndarynyń eki astanasynyń arasyn jaıaý júgirip ótken D. Imanqajy bul sportpen 4 jyldan beri aınalysyp keledi.
«Jol boıy kezdesken eldi mekenderde turǵyndarmen júzdesip, salaýatty ómir saltyn nasıhattap keldim»,-deıdi marafonshy.
«Astana men Almaty qalalarynda bolatyn qysqy Azııa oıyndaryn halyq bolyp, memleket bolyp nasıhattap jatsaq, biz úshin abyroıly bolar edi. Mysalǵa, bizdiń elge kınonyń ataqty ártisteri kelip jatyr. Sol sııaqty sportta da osyndaı áıgili sportshylar kelip, Qazaqstandy tanytyp jatsa, óte jaqsy bolar edi. Sondyqtan osy sharaǵa men de ózimniń bir nıetimdi kórsetsem dedim. Maqsatymyz, rýhymyz bir bolsa, talaı tabysqa jetýge bolady», deıdi D. Imanqajy.
