Marafonshy Sársenbaı Qotyrashov Qazaqstannan Qytaıǵa jaıaý saıahatqa attanady
ASTANA. KAZINFORM – Búgin elordada Sársenbaı Qotyrashovtyń kezekti jaıaý aralaýǵa shyǵatyn saıahatyna daıyndyq barysyn talqylaý maqsatynda kezdesý ótti. Tanymal saıahatshynyń bul bastamasyn qoldaý sharasy «QazaqGeography» respýblıkalyq qoǵamdyq birlestigi men 5-shi Dúnıejúzilik Kóshpendiler oıyndaryn daıyndaý jáne ótkizý dırektsııasymen birlese uıymdastyryldy.
Kezdesý barysynda «QazaqGeography» RQB basqarma tóraǵasynyń orynbasary Valentına Alııasova mádenı jáne geografııalyq zertteýlerdiń mańyzdylyǵyn atap ótip, Sársenbaı Qotyrashovtyń Ortalyq Azııa týraly bilimdi nasıhattaýdaǵy rólin erekshe tilge tıek etti. Ol uıym atynan saıahatshyǵa qoldaý bildirip, aldaǵy saıahatynda sáttilik tiledi.
Sondaı-aq, 5-shi Dúnıejúzilik kóshpendiler oıyndaryn daıyndaý jáne ótkizý dırektsııasy Basshysynyń keńesshisi Mádı Manatbek te óz tilegin jetkizip, Sársenbaı Ospanulynyń mıssııasyn sátti oryndap, elge aman-esen oralýyn tiledi.
«Sársenbaı Ospanulyn saıahatshy dep tanysaq, búgin ol kisiniń kóshpeli jurttyń ómir-saltyn tereń zerttegen tarıhshy-ǵalym ekenine kózimiz jetti. Kóshpendiler otany — qazaq eli ekenin sapar jasaǵan jeriniń barlyǵynda aıtyp, tarıhı tizbegin jalǵastyryp kele jatqanyna tánti boldyq. Endi mine Reseı, Mońǵolııa, Qytaı elderine jasaıtyn saparynda Astanada ótetin 5-shi Dúnıejúzilik kóshpendiler oıynyndaryn barynsha nasıhattaımyn dep otyr. Sársenbaı aqsaqaldyń sapary sátti bolsyn deımiz!», — dedi ol.
Tanymal saıahatshy jáne marafonshy Sársenbaı Qotyrashov shamamen 3000 shaqyrymdy quraıtyn úlken jaıaý saparǵa attanady. Ol 2 tamyz kúni Óskemen qalasynan shyǵyp, kúnine ortasha eseppen 40 shaqyrym júrýdi josparlap otyr. Saıahatshy óziniń úsh aıǵa sozylatyn saparyn 5-shi Dúnıejúzilik kóshpendiler oıyndaryna arnaıtynyn jetkizdi.
«Men ózimniń jaıaý saıahatymdy aldaǵy 5-shi Dúnıejúzilik kóshpendiler oıyndaryna arnaımyn. Biz kóshpendilerdiń urpaǵymyz jáne olardyń baı mádenıeti men muralaryn álemge tanytqym keledi. Men Altaı jáne Mońǵolııa arqyly Qytaıǵa deıin jetýdi josparlap otyrmyn», — dedi Qotyrashov saparǵa attanar aldynda.
Sapary barysynda Sársenbaı Ospanuly kóshpendi halyqtardyń mádenıeti men dástúrlerimen tanysyp, óz áserlerimen jáne jańalyqtarymen áleýmettik jeliler men medıa arqyly kópshilikpen bólisýdy josparlap otyr. Onyń ekspedıtsııasy Ortalyq Azııa kóshpendi halyqtarynyń baı tarıhy men mádenı murasyn nasıhattaýǵa baǵyttalǵan.
Sársenbaı Qotyrashov - marafonshy, saıahatshy, shabyttandyrýshy tulǵa. 2022 jyly ol 72 jasynda elimizdiń 17 oblysyn 6 aıda 8000 km joldy jaıaý júrip ótkeni úshin Qazaqstandatanymal bola bastady. 2023 jyly Atyraý (Qazaqstan) qalasynan Ystambul (Túrkııa) qalasyna deıin jaıaý 3000 km qashyqtyqty baǵyndyrdy.
