Marafonǵa qandaı shekteý qoıylýy múmkin — vıtse-mınıstr jaýaby

ALMATY. KAZINFORM — 20 sáýir kúni ótken Almaty jartylaı marafony kezinde eki adam jarys jolynda jan tapsyrdy.

Týrızm jáne sport mınıstri Erbol Myrzabosynov jartylaı marafondaǵy qaıǵyly jaǵdaıdan soń mınıstrlik mundaı sharalarǵa talapty kúsheıtetinin áleýmettik jelide jazǵan edi.

«Qazaqstandaǵy tsıfrlyq týrızm — 2025» forýmy barysynda Kazinform tilshisi Týrızm jáne sport mınıstriniń orynbasary Erjan Erkinbaevtan naqty qandaı sharalar qabyldanatynyn surady.

— Biz bul máseleni Tsıfrlyq damý, ınnovatsııalar jáne aeroǵarysh ónerkásibi vıtse-mınıstrimen talqyladyq. Olardyń da usynystary bar. Mysaly, pýlsometr ne sport saǵattaryn taǵyp, ózine yńǵaıly pýls aımaǵynda júgirý. Biraq marafon — bul kásibı sport emes, buqaralyq sport. Sondyqtan shekteý ne talap qoıý durys bolmaıdy. Negizgi statıstıkany alsaq, dúnıejúzi boıynsha 80 myń marafonshy arasynda 1 adam qaıtys bolady eken. Ókinishke qaraı, bul ómir. Saǵaty bolsa da, bolmasa da qaıtys bolǵan eki azamat ta tájirıbeli marafonshylar. Birinshi júgirýleri emes. Shekteý qoıǵanmen 100 paıyzdyq sheshim joq. Biraq búgin mınıstr federatsııa jáne sport mamandaryn biriktirip, olardyń usynystaryn talqylaıdy, — dedi vıtse-mınıstr.

Eske salaıyq, buǵan deıin Almatyda jartylaı marafonǵa qatysqan eki adam qaıtys bolǵanyn jazǵanbyz.