Marafonda eki adamnyń qazasyna qatysty qylmystyq is qozǵaldy ma — ІІM jaýaby

ASTANA. KAZINFORM — Almatyda ótken jartylaı marafon kezinde eki adamnyń qazasyna qatysty qylmystyq is qozǵaldy ma? Bul suraqqa Іshki ister mınıstriniń orynbasary Sanjar Ádilov jaýap berdi.

— Tıisti tekserý boldy. Eki adamnyń ólimi boıynsha krımınaldyq mán-jaı anyqtalmady. Bizde qylmystyq is tek qylmys quramy bolǵanda ǵana qozǵalady. Atalǵan oqıǵada qylmystyq is qozǵalmady. Tekseris nátıjesinde zorlyq-zombylyq belgileri anyqtalmady. Bul turǵyda sot-medıtsınalyq saraptama ortalyǵynyń tıisti aktileri bar, — dedi S. Ádilov Parlament Májilisindegi Úkimet saǵatynan keıin tilshiler suraǵyna jaýap bere otyryp.

Eske salsaq, jaqynda Almatyda jartylaı marafonǵa qatysqan eki adam qaıtys boldy.

Marafon uıymdastyrýshylary málim etkendeı, júgirý kezinde eki qatysýshy kóz jumdy. Onyń biri — 84 jastaǵy Aqqoıan Rsalıev bolsa, ekinshisi 21 jastaǵy Nurbol Ahmadı.

Týrızm jáne sport mınıstriligi marafondaǵy qaıǵyly jaǵdaıdan soń mundaı sharalarǵa talapty kúsheıtpek.