Maradonany óler aldynda emdegen dárigerler 25 jylǵa deıin sottalýy múmkin

ASTANA. KAZINFORM — Argentınanyń aty ańyzǵa aınalǵan fýtbolshysy Dıego Maradonanyń óler aldynda qamqorshysy bolǵan 8 medıtsına qyzmetkeriniń jeteýiniń isi sotta qaralady. Olarǵa «óz isine nemquraıdy qarady, sonyń saldarynan áıgili fýtbolshy kóz jumdy» degen aıyp taǵylyp otyr.

VVS-diń habarlaýynsha, dárigerler isi baıqaýsyzda kisi óltirý baby boıynsha qaralady.

Maradona 2020 jyly 25 qarashada 60 jasynda qaıtys boldy. Buǵan deıin oǵan mıyndaǵy qan uıyǵyn alyp tastaý úshin ota jasalǵan. Onyń ishimdik pen nashaqorlyqtan emdelgeni de belgili boldy.

Prokýratýra fýtbolshy qaıtys bolǵannan keıin kóp uzamaı dárigerler men medbıkelerge qatysty tergeý amaldaryn bastady. 2021 jyly Maradona óliminiń mán-jaıyn zerttegen 20 sarapshydan turatyn komıssııa medıtsınalyq toptyń áreketin «orynsyz, jetkiliksiz jáne jaýapsyz» dep tapty.

Sarapshylar (sot atap ótkendeı) ańyzǵa aınalǵan fýtbolshy tıisti medıtsınalyq mekemede durys emdelgende (Maradona úıinde qaıtys boldy — BBC) onyń «tiri qalý múmkindigi bar edi» degen qorytyndyǵa keldi.

Aıyptalǵandardyń arasynda Maradonanyń neırohırýrgy Leopoldo Lýke (onyń jeke dárigeri bolǵan), psıhıatr jáne medbıkeler bar. Olardyń barlyǵy fýtbolshynyń ólimine kináli ekenin joqqa shyǵaryp otyr.

Aıyptalýshylar ólimge ákeletinin bile tura, abaısyzda adam óltirgeni úshin kináli dep tanylsa, olar segiz jyldan 25 jylǵa deıin bas bostandyǵynan aırylýy múmkin.

Dıego Maradona fýtbol tarıhyndaǵy eń uly oıynshylardyń biri bolyp sanalady. FIFA resmı saıtyndaǵy daýys berý qorytyndysy boıynsha ol HH ǵasyrdyń úzdik fýtbolshysy tanyldy.

Osyǵan deıin Argentınanyń baǵyna týǵan dańqty sportshy Dıego Maradonanyń muragerleri 1986 jylǵy álem chempıonatynda fýtbolshyǵa berilgen «Altyn doptyń» aýktsıonǵa qoıylýyna qarsy shyǵyp, sotqa shaǵymdanǵany týraly jazdyq.