Maradona Messıden keshirim surady
ASTANA. QazAqparat - HH ǵasyrdyń aty ańyzǵa aınalǵan fýtbolshysy argentınalyq Dıego Armando Maradona fýtboldan álem chempıonaty barysynda birneshe iri telearnalarda sarapshylyq jasaýda. Bul týraly rg.ru saıty habarlady.
Maradona chempıonattyń Brazılııada ótip jatqanyna qaramastan, uıymdastyrýshylardy synap, brazılııalyqtarǵa qatysty kóńilge tıetin boljamdar jasaýdan bas tartpaı otyr.
«Meniń oıymsha, FIFA men jergilikti uıymdastyrý komıteti narazylyq sharalaryna kóp kóńil aýdaryp, jankúıerler men fýtbol jaıyn umytyp ketken sııaqty. Matchtarda bos oryn qalyp qoıýǵa qalaı ǵana jol berip otyr?! Olar oıyn týraly emes, tek ózderiniń qara bastarynyń paıdasyn ǵana oılaıdy», - deıdi ol.
Sonymen qatar, Dıego Armando Argentına quramasynyń alǵashqy oıyny ózine qatty unaǵanyn aıtyp, tipti Lıonel Messıden keshirim suraǵan.
«Árıne, barlyǵymyz keremet jarqyn bastama kúttik, degenmen, eń bastysy nátıje bar. Komanda jeńip keledi, sondyqtan ol jeńistiń qalaı kelgeni mańyzdy emes. Endigi jol jeńildeı túsedi», - dep atap ótti ol.
Al oıynshylar týraly aıta kelip Maradona Messıge erekshe yqylasyn bildirgen.
«Oıynshylarǵa keler bolsaq, Messıdiń aldynda basymdy ıemin. Men onyń el quramasynyń sapynda kórsetip júrgen ónerin jıi synaıtyn edim, biraq Lıonel óziniń myqty fýtbolshy bolyp óskenin dáleldedi. Sondyqtan men odan keshirim surap, eki betinen kezek súıýge ázirmin. Bul jigit chempıonatta bizdiń komandany jeńiske jetkizýge qabiletti. Sheshýshi oıynda biz Brazılııany shań qaptyramyz degen úmittemin. Bul meniń jatsam-tursam oılaıtyn bir ǵana armanym!», - dedi Maradona.
