Maradona: Messı álemniń úzdik fýtbolshysy degen ataqqa laıyq emes
ASTANA. QazAqparat - Katalondyq «Barselona» men Argentına quramasynyń shabýylshysy Lıonel Messı álem chempıonatynyń úzdik oıynshysyna beriletin «Altyn dop» syılyǵyna laıyqty emes. Bul pikirdi dańqty fýtbolshy Dıego Maradona bildirdi, dep habarlady sheteldik BAQ.
«Ol bul ataqqa laıyqty emes. Muny ádil sheshim dep aıtýǵa bolmaıdy. Men onyń bul nagradadan bas tartqanyn kórgim keledi», - dedi Maradona.
Onyń atap ótýinshe, týrnırdiń úzdik oıynshysy bolýǵa álem chempıonatynyń 5 oıynynda 6 gol soqqan kolýmbııalyq Hames Rodrıges laıyqty.
Al álem chempıonatynyń 7 kezdesýinde jasyl alańda tamasha oıyn órnegin kórsetken Messı 4 gol soqqan bolatyn.
Aıta keteıik, Argentına kapıtany tórt márte álemniń eń úzdik fýtbolshysy atanǵan edi, degenmen álem birinshiliginiń úzdik oıynshysy mártebesine tuńǵysh ret qol jetkizip otyr.
