Maradona: Brazılııa alańda «ólse de, tirilse de» berilmeýi tıis
ASTANA. QazAqparat - Brazılııa óz komandasynyń qatary álsiregenine qaramastan, jartylaı fınalda «murynnan qan ketkenshe» oınaýy mindetti.
Argentınanyń ańyz fýtbolshysy Dıego Maradona búgin Brazılııa men Germanııa quramalarynyń fýtboldan álem chempıonatynyń jartylaı fınaldyq kezdesýi qarsańynda osyndaı pikir bildirdi.
Onyń aıtýynsha, fýtbolshylar alańda «jan berýge» daıar ekendikterin dáleldeýleri shart.
«1990 jyly fınaldyń aldynda biz dıskvalıfıkatsııa men jaraqattar saldarynan negizgi quramnyń 4 oıynshysynan aıyrylǵan bolatynbyz», - dep keltiredi goal.com Maradonanyń sózderin. - Degenmen, GFR quramasymen sońyna deıin julystyq, ózimiz úshin de, shyqpaı qalǵan fýtbolshylar úshin de. Brazılııa fýtbolshylary da alańda «ólse de, tirilse de» naǵyz shaıqasta berilmeýleri shart».
Aıta keteıik, bul kezdesýge brazılııalyqtardyń kóshbasshysy Tıagý Sılva (dıskvalıfıkatsııa) men komandanyń úzdik shabýylshysy Neımar (jaraqat) alańǵa shyǵa almaıdy.
