Maqsut Narikbayev University-ge QAA ınstıtýtsıonaldyq akkredıtteýden ótkeni týraly sertıfıkat tabystaldy
KAZINFORM — ASTANA. Búgin Almatyda Maqsut Narikbayev University-ge QAA ınstıtýtsıonaldyq akkredıtteýden ótkeni týraly sertıfıkat resmı túrde tabystaldy. Bul akkredıtteý ýnıversıtettiń Brıtandyq jáne halyqaralyq joǵary bilim sapasynyń standarttaryna sáıkes keletindigin rastaıdy.
Quality Assurance Agency (QAA) — Ulybrıtanııanyń Joǵary bilim berý sapasyn qamtamasyz etý jónindegi akkredıtteý agenttigi. Buryn QAA sarapshylarymen syrtqy baǵalaýdan ótken joǵary oqý oryndar qataryna Russel Group-ke kiretin Ulybrıtanııanyń úzdik ýnıversıtetteri, sonyń ishinde University of Oxford, University of Cambridge, King’s College London jáne taǵy da basqa oqý oryndary kiredi (eskertý: Russel Group — Ulybrıtanııadaǵy eń úzdik ýnıversıtetterdi biriktiretin amerıkalyq Aıvı lıgasynyń brıtandyq balamasy).
QAA sarapshylary ulttyq jáne aımaqtyq esepterdi (reports) únemi jarııalap otyratyn halyqaralyq joǵary bilim berý taldaýshylary. Osy agenttiktiń standarttaryna sáıkestik — ýnıversıtettiń akademııalyq mádenıetiniń joǵary deńgeıin rastaıtyn mańyzdy jetistik.
Bul degenimiz MNU túlekteriniń dıplomdary Ulybrıtanııanyń úzdik Joǵary oqý oryndarynyń dıplomdarymen qatar tanylatynyn bildiredi. Atalmysh akkredıtteýden ótý kezinde joǵary oqý ornyn basqarý modeliniń tıimdiligine, Akademııalyq adaldyq qaǵıdattaryna, stýdenttermen baılanys, sondaı-aq bilim berý baǵdarlamalarynyń sapasyn qamtamasyz etý tetikteriniń tıimdiligine erekshe nazar aýdarylady.
«TMD-da birinshi bolyp QAA Brıtanııalyq akkredıtatsııasyn alǵan Maqsut Narikbayev University — óz mysalynda Qazaqstanda halyqaralyq deńgeıge jáne joǵary bilim sapasynyń joǵary standarttaryna sáıkes keletin ýnıversıtetter bar ekenin dáleldeı aldy. Elimizdiń basqa joǵary oqý oryndary da Maqsut Narikbayev University jetken sapa deńgeıine umtylýy tıis. Bul ýnıversıtet búgingi jetistikterinde toqtalyp qalmaı, „kemeldikke shek joq“ qaǵıdaty boıynsha áreket etetinin atap ótkim keledi», — dedi QR Ǵylym jáne joǵary bilim mınıstri Saıasat Nurbek.
«Bizdiń ýnıversıtettiń basty mıssııasy — sapaly bilim berý arqyly Qazaqstan halqyna qyzmet etý. Oqý ordamyzdyń halyqaralyq deńgeıdegi turaqty jetistikteri — bizdiń joǵary talaptarǵa berik ekenimizdi aıǵaqtap, álemdegi eń myqty ýnıversıtetterdiń deńgeıine bir qadam jaqyndatady», — dedi MNU Basqarma tóraǵasy Talǵat Nárikbaev.
Bul akkredıtatsııa ýnıversıtettiń postakkredıtatsııalyq baqylaýdan (mid-cycle review) qanaǵattanarlyq nátıje alý shartymen 5 jyl merzimge jaramdy. Ýnıversıtetke arnaıy jekelendirilgen QAA akkredıtteý belgisin qoldanýǵa, ony resmı paraqshalarda jarııalaýǵa jáne ony túlekterdiń dıplomdaryna ornalastyrýǵa resmı túrde ruqsat beriledi.
Krıs Bland, QAA akkredıtteý jáne keńes berý bóliminiń basshysy: «QAA Maqsut Narikbayev University akkredıtteý úderisiniń sátti aıaqtalýyn qýanyshpen quttyqtaıdy. Biz Qazaqstandaǵy áriptesterimizben qýana jumys atqardyq, bolashaqtaǵy yntymaqtastyǵymyzdy asyǵa kútetin bolamyz», — dedi.
Buǵan deıin Maqsut Narikbayev University halyqaralyq ınstıtýtsıonaldyq akkredıtteýden jáne FIBAA eýropalyq agenttiginiń bilim berý baǵdarlamalaryn akkredıtteýden ótken bolatyn.
