Maqsut Narikbayev University-de tórt eldiń stýdentteri TMD-daǵy alǵashqy Legatonda saıysqa tústi
ASTANA. KAZINFORM -18-19 sáýirde Maqsut Narikbayev University-de (MNU) Qazaqstan, Qyrǵyzstan, Reseı jáne Ózbekstan stýdentteriniń basyn qosqan TMD-daǵy alǵashqy International Legathon MaxUP 2025 biregeı halyqaralyq is-sharasy ótti.
Zań salasyndaǵy keıs-chempıonaty zertteý forýmymen biriktirildi, onda stýdentter jasandy ıntellektiniń qarqyndy damýy jaǵdaıynda quqyqtyń bolashaǵyn modeldedi.
Legathon MaxUP 2025 basty taqyryby - jasandy ıntellekt dáýirindegi etıka jáne quqyq. Toǵyz stýdenttik komanda jasandy ıntelektiniń adamnyń negizgi quqyqtaryna áser etip, teńdessiz quqyqtyq syn-qaterlerdi týǵyzǵan stsenarııimen jumys istedi. Eki kún boıy olar kúrdeli keısterdi taldap, normatıvtik tásilderdi ázirledi jáne tsıfrlyq quqyqtyń ózekti máseleleri boıynsha zertteý jobalaryn qorǵady.
Memleket basshysy Qasym-Jomart Toqaev buǵan deıin azamattardyń jasandy ıntellekt salasyndaǵy saýatyn ashyp, biliktiligin arttyrý qajet ekenine nazar aýdardy. Sonymen qatar, ótken aptada Mańǵystaý oblysyna jumys sapary barysynda Qazaqstan Prezıdenti qazir jańa tehnologııalar men jasandy ıntellekt baǵyttaryn damytý ózekti bolyp otyrǵanyn atap ótti. JI-diń syń-qaterlerimen baılanysty Legathon-nyń ózekti taqyryby Ala-Too Halyqaralyq ýnıversıteti (Qyrǵyzstan), ÝrGıÝÝ (Ekaterınbýrg, Reseı), «Joǵary ekonomıka mektebi» Ǵylymı-zertteý ýnıversıteti (Máskeý, Reseı), TGıÝÝ (Tashkent, Ózbekstan), MNU (Astana), Yessenov University (Aqtaý), Ál-Farabı atyndaǵy QazUÝ, AlmaU, Abylaı han atyndaǵy QazHQjÁTÝ (barlyǵy Almaty qalasynan) stýdentteriniń qyzyǵýshylyǵyn týdyrdy.
«Biz úshin birinshi Legathon óz ómirin zań ústemdigi men ádilettilikti ornyqtyrýǵa arnaǵan, bilim ordamyzdyń qurmetti rektory Maqsut Sultanuly Nárikbaevtyń týǵanyna 85 jyl tolýyna oraı ótip jatqany erekshe mańyzdy. Biz ıdeıalar birigetin keńistik qurǵymyz keledi, al stýdentter tek qatysýshylar emes, jańa zań sheshimderiniń teń avtorlaryna aınalady. Bul Legaton - bolashaq quqyǵy, búginde oqýlyqtarda joq syn-qaterler týraly», - dep atap ótti MNU basqarma tóraǵasy Talǵat Nárikbaev.
Stýdentter densaýlyq saqtaý salasynda JI paıdalaný keısi boıynsha sheshimderdi jáne avtorlyq zertteýlerdi usyndy. Olar derbes JI-júıelerdi jaýapkershilikke tartý men eki maqsattaǵy tehnologııalardy retteýden bastap, sandyq kemsitýshilikten qorǵaý men jeke tulǵanyń sandyq kóshirmelerin modeldeýge deıingi taqyryptardyń keń aýqymyn qamtıdy.
Qatysýshylar ozyq tehnologııalarmen zań jumysyna daıyndyǵyn kórsete otyryp, batyl tujyrymdamalar men standartty emes tásilderdi usyndy. Komandalardyń jumysyn Bas prokýratýra, Ádilet mınıstrligi, Joǵarǵy Sot ókilderi men jetekshi halyqaralyq jáne qazaqstandyq zań kompanııalarynyń seriktesterinen quralǵan joǵary kásibı qazylar alqasy baǵalady.
«Barlyǵy joǵary deńgeıde, tipti usaq-túıekke deıin oılastyrylǵan. Mysaly, biz tek daýys bergennen keıin ǵana qatysýshylardyń qaı ýnıversıtetten kelgenderin bildik. Mundaı jarystar stýdentterge naǵyz praktıka men baǵa jetpes tájirıbe alýǵa múmkindik beredi. JI - búgingi tańda eń ózekti taqyryptardyń biri. Endi Legathon MaxUP 2026-ny asyǵa kútemiz», - dedi QR ádilet vıtse-mınıstri Danıel Vaısov.
Aıta keteıik, saıysty jyl saıyn ótkizý josparlanǵan. Júlde qory 1,7 mıllıon teńgeni qurady. Birinshi orynǵa «Joǵary ekonomıka mektebi» Ǵylymı-zertteý ýntversıtetiniń (Máskeý, Reseı) stýdentteri ıe boldy.
«Іs-sharanyń atmosferasy keremet. Bizdiń jumysymyzdyń joǵary baǵalanǵanyna qýanyshtymyz. Bul shynymen de shabytty tájirıbe boldy», - dedi «Joǵary ekonomıka mektebi» komandasynyń múshesi Tatıana Jmýrına.
Birinshi halyqaralyq Legathon MaxUP 2025 quqyq pen tehnologııa arasyndaǵy dıalogty qalyptastyrýdaǵy mańyzdy qadam boldy. Sondaı-aq, stýdentterge óz bilimderin praktıkada qoldaný men salanyń qazirgi jáne bolashaq mamandarymen tájirıbe almasýǵa múmkindik berdi. MNU tsıfrlyq transformatsııa jaǵdaıynda tıimdi jumys isteı alatyn zańgerlerdiń jańa býynyn daıyndaýǵa úles qosa otyryp, osy formatty damytýdy jalǵastyrady.
Osyǵan deıin Qazaqstanda qaı salaǵa jasandy ıntellekt belsendi engizilip jatqany týraly jazdyq.