Maqsut Narikbayev University-de «Al Jazeera Week» jabylý saltanaty ótti
ASTANA. KAZINFORM – MNU Halyqaralyq jýrnalıstıka mektebinde «Al Jazeera Week» - «Al Jazeera aptalyǵy» aıaqtaldy. Bul is-sharany Maqsut Narikbayev University qatysýymen QR Prezıdenti Teleradıokesheni men Al Jazeera Media Network uıymdastyrǵan bolatyn.
Jabylý saltanatynda MNU Provosty Sergeı Pen halyqaralyq jýrnalıstıka mektebiniń stýdentteri qundy tájirıbe jınaı alǵanyn atap ótti.
«Al Jazeera – álemdegi jetekshi BAQ jáne biz stýdentterimizdiń halyqaralyq mamandardan jýrnalıstıkanyń eń ózekti taqyryptary men ádisteri boıynsha bilim alýǵa biregeı múmkindik alǵanyna qýanyshtymyz. Osy oraıda Al Jazeera mamandarynyń jýrnalısterdiń kelesi urpaǵyn tárbıeleýge degen umtylysy úshin úlken alǵysymdy bildiremin. Osy jemisti yntymaqtastyǵymyz ary qaraı tabysty túrde jalǵasady degen nıettemiz. Sondaı-aq stýdentterge osyndaı múmkindik bergen QR Prezıdent Teleradıokeshenine erekshe alǵysymdy bildirgim keledi», - dedi ol.
«Al Jazeera aptalyǵy» qatysýshylaryna «Jańalyqtar reportajdary», «Derekter jýrnalıstıkasy», «Mobıldi jýrnalıstıka», «Tsıfrlyq storıtellıng» jáne «Jańalyqtar júrgizýshileriniń kýrstary» sııaqty taqyryptar boıynsha 100 saǵattan astam teorııalyq jáne praktıkalyq sabaqtar ótkizildi. Aıta keteıik, mundaı tájirıbe almasý alǵash ret Qazaqstanda ǵana emes, Ortalyq Azııada da júrgizilýde.
«Al Jazeera aptalyǵy» oqý baǵdarlamasyn aıaqtaǵannan keıin stýdentter ár taqyryp boıynsha kýrstyq jobalaryn qorǵap, Al Jazeera Media Institute sertıfıkattaryn aldy.
Sondaı-aq «Al Jazeera Week» aptalyǵy aıasynda Qazaqstannyń BAQ ókilderi men halyqaralyq jýrnalıstıka mektebiniń stýdentteri úshin «Maqsut Narikbayev Public Lecture» jobasynyń tórt qoǵamdyq dárisi ótti.
Esterińizge sala keteıik, 22 sáýirde Maqsut Narikbayev University-de Prezıdent Teleradıokesheni men Al Jazeera Media Network qoldaýymen «Al-Jazeera aptalyǵy» bastaldy.
Іs-shara aıasynda Maqsut Narikbayev University men Al Jazeera Media Institute dırektory Eman Ál-Amrı arasynda yntymaqtastyq týraly Memorandýmǵa qol qoıyldy. Bul memorandým akademııalyq tájirıbe almasýǵa, birlesken jobalardy júzege asyrýǵa jáne ýnıversıtettiń halyqaralyq mańyzdylyǵyn arttyrýǵa yqpal etýge baǵyttalǵan.
