Maorı tili joǵalýdyń az-aq aldynda tur
ASTANA. Qyrkúıektiń 11-i. QazAqparat - Jańa Zelandııanyń baıyrǵy turǵyndary - maorı halqynyń tili 2050 jylǵa qaraı jer betinen múldem joǵalyp ketýi múmkin. Jańazelandııalyq Masseı ýnıversıtetiniń ǵalymdary osyndaı tujyrymdaryn aıtyp otyr, dp habarlaıdy ITAR-TASS agenttigi.
Maorı tilin zertteý mamany Rangı Mataamýanyń aıtýynsha, tildiń joǵalýyna túzemdikterdiń ózderi de kináli. «Maorılikter kúndelikti turmystarynda ana tilderi men aǵylshyn tiliniń qospa tilin jıi paıdalana bastaǵan», deıdi doktor Mataamýa. «Maorı tili jandanyp kele jatyr degen pikirler, qate. Tildi bolashaq urpaqqa saqtaý úshin, maorılikter ózara kúndelik ti ana tilderinde sóılesýleri kerek»,- deıdi til mamany.
Jergilikti telekompanııalardyń biriniń atqarýshy dırektory Djon Bıshar myrza ǵalym Rangı Mataamýanyń kózqarasyn bólisip otyr. Onyń aıtýynsha, tilderi joǵalyp ketpeý úshin, maorılikter kóp kúsh-jiger jumsaýlary kerek. «Ókinishke oraı, halyqaralyq tájirıbe kórsetip otyrǵandaı, álemde ár eki apta saıyn baıyrǵy halyqtardyń bir tili joǵalady eken», deıdi Bıshar myrza.
1987 jyly maorı tili Jańa Zelandııanyń ekinshi resmı tili retinde jarııalanǵan bolatyn. Biraq, sońǵy halyq sanaǵynyń málimetteri boıynsha, maorı halqynyń tek 23 paıyzy ǵana ana tilderinde erkin sóıleı alady eken, al 43 paıyzy ana tilderin múldem bilmeıdi.
