Maorı taıpasy Qazaqstannyń Jańa Zelandııadaǵy elshisin qarsy aldy
ASTANA. QazAqparat - Qazaqstan elshisi Jańa Zelandııanyń general-gýbernatoryna senim gramotasyn tapsyrdy, dep habarlaıdy «QazAqparat» QR Syrtqy ister mınıstrliginiń baspasóz qyzmetine silteme jasap.
19 sáýir kúni Vellıngtonda (Jańa Zelandııa) Qazaqstannyń Sıngapýrdaǵy jáne Jańa Zelandııadaǵy elshisi Úsen Súleımen Jańa Zelandııanyń general-gýbernatory Petsı Reddıge senim gramotasyn tapsyrdy.
Osy rásim barysynda Reddı senim gramotasynyń Qazaqstan men Jańa Zelandııa arasyndaǵy dıplomatııalyq qarym-qatynastardyń ornaǵanyna 25 jyl tolyp otyrýyna oraı berilýin joǵary baǵalady jáne ekijaqty qarym-qatynastyń jyly, dostyq baǵytynda órbip kele jatqandyǵyn atap ótti.
General-gýbernator sonymen qatar, Qazaqstan Prezıdenti Nursultan Nazarbaevtyń halyqaralyq jáne óńirlik qaýipsizdikti qamatamsyz etý, ıadrolyq qarýdan bas tartý men ony taratpaý jónindegi isterge qosqan úlesin joǵary baǵalady. Sondaı-aq ol qazaqstandaǵy ekonomıkalyq jáne saıası reformalardyń mańyzdylyǵyn atap ótti.
Reddı Qazaqstannyń BUU Qaýipsizdik keńesiniń turaqty emes múshesi retindegi isterine jáne EKSPO-2017 kórmesin ótkizýge sáttilik tiledi. Ol sondaı-aq el basshylyǵynyń Jańa Zelandııa azamattary úshin Qazaqstanda 30 kúnge deıin vızasyz júrýge bergen ruqsaty úshin rızashylyǵyn bildirdi.
Óz kezeginde Súleımen jeke óziniń jáne Elbasynyń Jańa Zelandııa úkimeti men halqyna degen shyn júrekten joldaǵan lebizin jetkizdi.
Dıplomat sózinde geografııalyq jaǵynan alshaq jatqandyǵyna qaramastan Qazaqstan men Jańa Zelandııanyń halyqaralyq arenada mańyzdy áriptes ekendigin jáne elderdiń ekijaqty saýda ekonomıkalyq qarym-qatynastardy damytýda úlken áleýetke ıe ekendigin atap ótti. Bul rette elshi ásirese agroónerkásip salasyndaǵy baılanystarǵa erekshe ekpin túsirdi. Áńgime sońynda general-gýbernator Prezıdent Nursultan Nazarbaevqa odan ári atqaratyn isterine de sáttilik tilep, eki el arasyndaǵy yntymaqtastyqty arttyrýdaǵy dıplomatııalyq jumystarynyń sátti bolýyna tilektestigin bildirdi.
