Manzorov isine sońǵy núkte qoıylǵan joq - agenttik

NUR-SULTAN. QazAqparat - Almaty oblysy ákiminiń orynbasary Baǵdat Manzorovqa qatysty iske sońǵy núkte qoıylǵan joq. Bul týraly búgin QR Sybaılas jemqorlyqqa qarsy is-qımyl agenttigi 1-shi departamentiniń aǵa tergeýshisi Danııar Begaıdarov aıtty, dep habarlaıdy QazAqparat tilshisi.

«Ózderińiz de biletindeı, 26 qazanda Manzorovqa qatysty qylmysty is Bas prokýratýra tarapynan toqtatylǵan bolatyn. Bas prokýratýranyń bul sheshimine oraı biz Bas prokýrordyń orynbasaryna shaǵym túsirgen edik. Alaıda, Bas prokýratýra bul shaǵymdy qanaǵattandyrýdan bas tartty. Jaýabyn jaqynda ǵana aldyq. Bul isti tyńǵylyqty alyp qaraıtyn bolsaq, Manzorovqa qatysty qylmystyq is elimizdiń eki azamatynyń aryzy boıynsha qozǵaldy. Onda Manzorovtyń jemqorlyq qylmys jasaǵany naqty kórsetilgen», - dedi ol.

Onyń atap ótýinshe, Bas prokýratýra Manzorovqa qatysty qylmystyq isti toqtatqannan keıin Sybaılas jemqorlyqqa qarsy is-qımyl agenttigine aryz jazǵan eki azamatty jalǵan málimetter bergeni úshin jaýapkershilikke tartý qajet.

«Qazirgi ýaqytta biz Bas prokýratýranyń dálelderin zerdelep jatyrmyz. Atalǵan dálelderdi tyńǵylyqty qarap bolǵannan keıin narazylyq tanytý máselesi qaralady. ıAǵnı, Bas prokýrordyń atyna shaǵym túsiremiz», - dedi D.Begaıdarov.

Aǵa tergeýshiniń sózine qaraǵanda, Bas prokýror da agenttik shaǵymyn qanaǵattandyrmaǵan jaǵdaıda Manzorovtyń ústinen aryz jazǵan eki azamatty jaýapkershilikke tartý máselesi qolǵa alynbaq.

Eske salsaq, Almaty oblysy ákiminiń orynbasary Baǵdat Manzorov ustalǵany týraly buǵan deıin habarlaǵan bolatynbyz.

QR Sybaılas jemqorlyqqa qarsy is-qımyl agenttigi oǵan QR Qylmystyq kodeksiniń 190-baby, 2-bóligi, 2-tarmaǵy («Laýazymyn paıdalaný arqyly asa iri kólemdegi alaıaqtyq») boıynsha aıyp taqty.

Keıin Bas prokýratýra Baǵdat Manzorovqa qatysty qylmystyq is toqtatylǵanyn resmı túrde málimdedi.

Kóp uzamaı sheneýnik óz qyzmetine qaıta kiristi.

Óz kezeginde agenttik Bas prokýratýranyń bul sheshimine narazylyq tanytty.