Mańyzdy máselelerdi sheshpeı alǵa baspaımyz - depýtat

PETROPAVL. QazAqparat - Parlament Májilisiniń depýtaty Aıqyn Qońyrov Qazaqstannyń álemde bolyp jatqan tórtinshi ındýstrııalyq revolıýtsııadan qalmaýy kerektigi - erekshe mańyzǵa ıe ekendigin paıymdaıdy. «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Prezıdenttiń Joldaýy týraly pikirin «QazAqparat» HAA tilshisine aıtyp berdi.

Májilismen óz sózinde aldymen Prezıdentiniń Joldaýda kórsetilgendeı 10 mindeti týraly sóz qozǵady.

«Meniń oıymsha, bul tapsyrmalardy búkil el bolyp qabyldap, Joldaýdy jiti zerteýimiz kerek. Sonymen birge, árbir adamnyń óz salasynda osy mindetterdiń iske asyrýyna kúsh salǵany abzal. Bank sektorynda, adamı resýrs, aýyl sharýashylyǵy, ındýstrıalızatsııa salasynda sheshimdi talap etetin máseleler barshylyq. Bul máselelerdi birjaqty etpeı, alǵa basa almaımyz. Bizdiń aldymyzdaǵy jańa mindet - 2050 jylǵa deıin álemniń damyǵan 30 eliniń qatarynan kóriný», - deıdi Aıqyn Qońyrov.

Depýtat óz sózinde elimizdiń naryq zamanynda damý dańǵylyna túskenin tilge tıek etti.

«Kez kelgen ekonomıkanyń damýy - qarajattyń bar bolýy. «Astana» halyqaralyq qarjy ortalyǵynyń ashylýy, bank júıesiniń qaıta jańǵyrtylýy eldiń aldaǵy ýaqytta damýynyń ózekti baǵyty dep aıtýǵa ábden bolady. Bizdiń memlekette qolǵa alynyp jatqan sharalar ekonomıkalyq ósimdi kózdep, halyqaralyq ekonomıkalyq daǵdarys jaǵdaıyna laıyqty jaýap bere bilýdi kózdeıdi», - deıdi májilismen.

Aıta keteıik, búgin QazaqstanRespýblıkasynyń Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalandy.