«Mánshúk erligi» áni alǵash ret oryndalady
ASTANA. 23 jeltoqsan. QazAqparat - 24 jeltoqsan, dúısenbi kúni (saǵat 16-30) Astana qalasyndaǵy Qazaq ulttyq óner ýnıversıtetiniń halyq aspaptar orkestriniń «Merekelik sherý» atty kontserti ótedi.
Bilim ordasynyń óner ıeleriniń qatysýymen bolatyn bul kontsertte halyq kompozıtorlarynyń jáne qazirgi sazgerlerdiń ánderi men kúıleri oryndalady.
Aıta ketý kerek, eń bastysy osy kontsertte «Mánshúk erligi» áni alǵash ret oryndalady. Bul Keńes Odaǵynyń Batyry, qazaqtyń dańqty qyzy Mánshúk Mámetovanyń týǵanyna 90 jyl tolýymen tuspa-tus kelip otyr.
Orkestrdiń jetekshisi - mádenıet qaıratkeri, sazger Nurlan Bekenov.
Kontsert Jeńis dańǵyly, 33-úı, Qazaq ulttyq óner ýnıversıtetiniń úlken zalynda ótedi.
