«Mansap kompasy» 166 myń adamǵa mamandyq tańdaýǵa kómektesti
ASTANA. KAZINFORM — «Mansap kompasy» arqyly oqýshylar suranysqa ıe mamandyqtardy anyqtaı alady, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Mınıstrlik mamandyq tańdaýǵa baǵyt-baǵdar beretin «Mansap kompasy» tsıfrlyq platformasy arqyly kásibı baǵdar berý jumystaryn jalǵastyryp keledi.
Platforma mektep oqýshylary men eresekterge bolashaq mamandyǵyn tańdaýǵa kómektesedi. Sonymen qatar eńbek naryǵynda suranysqa ıe mamandardy daıarlaýǵa jáne ekonomıkanyń qajettiligine saı kadr qalyptastyrýǵa múmkindik beredi.
Búginde platforma arqyly 166 myń adam kásibı baǵdarlaý dıagnostıkasynan ótken. Onyń ishinde 136 myńy — mektep oqýshylary, 30 myńy — eresek azamattar.
Tek 2026 jyldyń ózinde elimizdiń barlyq óńirinen 7-11 synypta oqıtyn 27 myńnan astam oqýshy kásibı baǵdarlaý testinen ótti. Platformany Qyzylorda jáne Mańǵystaý oblystarynyń, sondaı-aq Almaty qalasynyń turǵyndary belsendi paıdalanyp otyr. Jyl sońyna deıin 100 myńnan astam oqýshyny kásibı baǵdarlaý dıagnostıkasymen qamtý josparlanǵan.
«Mansap kompasynda» qazirgi tańda ekonomıkaǵa qajetti 730 mamandyq týraly aqparat jınaqtalǵan. Olar ekonomıkanyń 16 baǵytyna bólingen.
Paıdalanýshylar ózine qyzyqty mamandyq týraly tolyq aqparat alyp, onyń qaı salada qajet ekenin, qaı óńirde jumys tabýǵa bolatynyn, jalaqy deńgeıin jáne basqa da mańyzdy málimetterdi qaraı alady. Sonymen qatar tańdaǵan mamandyq boıynsha bilim alýǵa bolatyn oqý oryndary men bilim berý baǵdarlamalaryn tabýǵa múmkindik bar.
QR Eńbek jáne halyqty áleýmettik qorǵaý mınıstrligi Halyqty jumyspen qamtý departamentiniń dırektory Tóleý Muhtardyń aıtýynsha, «Mansap kompasy» adamnyń qyzyǵýshylyǵyn eńbek naryǵyndaǵy naqty múmkindiktermen baılanystyrýǵa kómektesedi.
— «Mansap kompasy» adamnyń kásibı qyzyǵýshylyǵyn bilim alý jáne keıin jumysqa ornalasý múmkindikterimen baılanystyrady. Mektep oqýshylary bolashaq mamandyǵyn tańdaý kezinde eńbek naryǵynda qandaı baǵyttarǵa suranys bar ekendigin jáne oǵan qandaı bilim qajet ekenin aldyn ala bile alady. Al eresekter úshin platforma mamandyq aýystyrýǵa nemese kásibı damýdyń kelesi baǵytyn josparlaýǵa kómektesetin qural bolady», — dedi departament basshysy.
Platformany damytý arqyly kásibı baǵdar berýdiń biryńǵaı tsıfrlyq júıesin qalyptastyrý kózdelip otyr. Bul júıege oqýshylarmen qatar ata-analar, muǵalimder, bilim berý uıymdary jáne jumys berýshiler de tartylady.
Osylaısha, «Mansap kompasy» — mamandyqty tańdap qoıýǵa emes, adamnyń qabileti men qyzyǵýshylyǵyna, sondaı-aq eńbek naryǵyndaǵy naqty suranysqa qaraı kásibı bolashaǵyn josparlaýǵa kómektesetin qural.
Budan buryn bıyl eń kóp bilim berý granty qandaı mamandyqtarǵa bólingenin jazdyq.
