Manhettende álemdegi eń bıik túrmeniń qurylysy bastaldy
ASTANA. KAZINFORM — Nıý-Iorktiń Manhetten aýdanynda álemdegi eń bıik túrme ǵımaratynyń qurylysy bastaldy. HOK sáýlet bıýrosy jobalaǵan nysanda qazir qurylys alańyn daıyndaý jumystary júrgizilip jatyr. Jańa túrme atyshýly Raıkers-Aılend túrme kesheniniń ornyn basýy tıis. Bul týraly Kazinform agenttiginiń Vashıngtondaǵy menshikti tilshisi Dezeen basylymyna silteme jasap habarlady.
Nıý-Iork qalasynyń Dızaın jáne qurylys departamenti (DDC) men HOK málimetinshe, ǵımarattyń bıiktigi 102 metr, al jalpy 13 qabaty bolady. Bul bıiktik kórshiles ornalasqan Nıý-Iork okrýginiń qylmystyq ister jónindegi sot ǵımaratymen shamalas.
Josparlanǵan nysan osy qalpynda salynsa, álemdegi eń bıik túzeý mekemesi atanbaq. Sol sebepti ony qazirdiń ózinde «túrme-neboskreb» dep atap júr.
Qurylysty 2032 jyly aıaqtaý josparlanǵan. Túrmede barlyǵy 1040 adamǵa arnalǵan oryn bolady.
Jergilikti turǵyndar men qoǵamdastyq ókilderiniń usynysy boıynsha ǵımaratta kelýshilerge arnalǵan arnaıy keńistik te qarastyrylǵan. Ol jaıly ári demalýǵa qolaıly etip jasalmaq. Sonymen qatar kelýshilerge ońaı qoljetimdi kıim jáne jeke zattarǵa arnalǵan shkaftar men dárethanalar bolady.
Bul nysan — Nıý-Iorktegi Raıkers-Aılend túrme kesheninen sottalǵandardy kóshirý úshin salynatyn tórt jańa túrmeniń biri. Ist-Rıverdegi Raıkers-Aılendte qaladaǵy 15 túzeý mekemesiniń 10-y ornalasqan. Onda 15 myńǵa deıin adam qamaýda ustalady.
Nıý-Iork bıligi 2019 jyly Raıkers-Aılend túrme keshenin jabý múmkindigin jarııalaǵan bolatyn. Onyń ornyna Manhetten, Brýklın, Bronks jáne Kýıns aýdandarynda kólemi shaǵyndaý tórt jańa túrme salý jospary usynyldy. Bul joba «Aýdandar deńgeıindegi túrmeler baǵdarlamasy» (Jails Program at the Borough Level) dep ataldy.
Tórt nysannyń jobasyn ártúrli sáýlet kompanııalary ázirlep jatyr. HOK Manhetten men Brýklındegi túrmelerdiń jobalaýymen aınalyssa, Cetra Ruddy Bronkstegi nysandy, al Michael Graves Kýınstegi túrmeni jobalaýda. Qazirgi ýaqytta tórt nysannyń da qurylysy júrip jatyr, alaıda olardyń árqaısysy ártúrli kezeńde.
Aıta keteıik, Nıý-Iork AQSh-ta evtanazııaǵa ruqsat bergen 14-shtat boldy.
