«Mańǵystaýmunaıgaz» AQ-y Jetibaı ken ornynyń uńǵymasyndaǵy apatty jaǵdaı tolyǵymen joıyldy

Bul týraly atalmysh aktsıonerlik qoǵamnyń baspasóz qyzmetinen málim etti. AQ-dan habarlaǵandaı, apattyq jaǵdaıdyń týyndaýyna jabdyqtardyń tozýy sebep bolǵan.

«Oqıǵa ornynda kompanııa basshylyǵymen birge, jedel top boldy. Oǵan QR TJM men «Aqberen» atqylamaǵa qarsy áskerılendirilgen jasaqtyń Mańǵystaý fılıalynyń kúshteri jumyldyryldy. Qazirgi ýaqytta jaǵdaı baqylaýǵa alynyp, qyzmetkerlerdiń densaýlyǵy men ekologııa úshin qaýip joq. Oqıǵa ornynda jetkilikti kólemde arnaýly tehnıka men personal jumys jasap jatyr», - dep atap ótti kompanııa ókilderi.

Baspasóz qyzmetiniń habarlaýyna qaraǵanda, 50 jyldyq tarıhy bar Jetibaı ken ornynda uzaq ýaqyt qoldanysta bolǵan qural-jabdyqtar paıdalanylyp keledi. «Mańǵystaýmunaıgaz» AQ-y eski jabdyqty aýystyrý baǵytynda jumystar júrgizýde, osy jumystarǵa 2010 jyly 8 mlrd. astam teńge salynǵan bolatyn, bul 2009 jylmen salystyrǵanda eki esege artyq.

Aıta keteıik, búgingi tańda «Mańǵystaýmunaıgaz» AQ elimizdegi munaıgaz óndirýshi iri kompanııalardyń biri sanalady. 2011 jylǵy 1 qańtardaǵy jaǵdaı boıynsha, aktsıonerlik qoǵamnyń ken oryndaryn ıgerý bastalǵaly beri 200 mıllıon tonnadan astam «qara altyn» óndirildi. Búginde «Mańǵystaýmunaıgaz» kompanııasynyń 15 munaı jáne gaz ken oryndarynda jalpy bastapqy geologııalyq qorymen 1 mlrd. 117 mln. tonna ıgerilýde. Negizgi óndiris nysandary - Qalamqas jáne Jetibaı ken oryndary. Munaı óndirýdiń jyldyq deńgeıi 5 mıllıon 700 myń tonnadan asady.