Mańǵystaýlyqtardyń memqyzmetke qulqy joq - Nurgúl Jannazarova
ASTANA. QazAqparat - Mańǵystaý oblysynda memlekettik qyzmetke degen qyzyǵýshylyq ózge óńirlermen salystyrǵanda tómen. Bul týraly óńirlik kommýnıkatsııalar qyzmetinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblystyq departamentiniń basshysy, Ádep jónindegi keńes tóraıymy Nurgúl Jannazarova aıtty, dep habarlaıdy QazAqparat.
«Mańǵystaý oblysynda 402 jarııalanǵan bos laýazymdarǵa birde-bir úmitker qatyspaǵan, onyń 193-i basshylyq laýazymdar. Mysaly Mańǵystaý oblysynyń ishki saıasat basqarmasy basshysynyń orynbasary men bólim basshysy laýazymdaryna ishki jáne jalpy konkýrstar 3 retten, Jańaózen qalalyq sáýlet jáne qala qurylysy bóliminiń basshysy laýazymyna ishki jáne jalpy konkýrstar 2 retten, Mańǵystaý oblysynyń jolaýshylar kóligi jáne avtomobıl joldary basqarmasynyń bólim basshysy laýazymyna ishki jáne jalpy konkýrs 2 ret jarııalanǵan. Alaıda, atalǵan memlekettik organdardaǵy basshy laýazymdarǵa jarııalanǵan konkýrstarǵa qatysýǵa nıet bildirgen úmitkerler bolmaǵan», - dedi ol.
Sondaı-aq, departament basshysynyń dereginshe, Mańǵystaý oblysy boıynsha testileýden ótý úshin nıet bildirgen azamattardyń sany artqanymen, oń nátıje alǵan azamattardyń kórsetkishi osy kúnge deıin tómen. Demek, memlekettik qyzmetke kelemin degen jergilikti turǵyndar testileýge nemquraıly qarap, qoldanystaǵy zańnamalardy tolyq meńgermegen.
«Mańǵystaý oblysy boıynsha «B» korpýsynyń memlekettik laýazymdaryna 2017 jyly testileýge 3563 azamat qatysyp, onyń 1149 ǵana, ıaǵnı, 32,2 paıyzy súrinbeı ótken», - dedi Nurgúl Jannazarova.
Aıta keterligi, atalǵan departamenttiń baspasóz qyzmeti usynǵan derekterge sáıkes, 2018 jylǵy 1 qańtarda 273 memlekettik organnyń memlekettik qyzmetshileriniń shtattyq sany 3124 birlik bolsa, naqty sany 2789 adamdy quraǵan. Olardyń ishinde áıelder sany - 1645 nemese 59 paıyz. Jergilikti atqarýshy memlekettik organdarda qyzmetshilerdiń shtattyq sany - 1347, naqty sany - 1188. Ákimdikterdegi memlekettik qyzmetshi áıelder sany - 701, olardyń ishinde basshylyq laýazymdarda - 210 adam. Memlekettik qyzmetshilerdiń ortasha jasy - 36,2.
«Sonymen qatar, Mańǵystaý oblysynda «Qazaqstan Respýblıkasynyń úzdik memlekettik qyzmetshisi» konkýrsyna qujat jınaý bastaldy. Elbasynyń «100 naqty qadam» Ult josparymen kózdelgen, kásibı memlekettik apparatty qalyptastyrý maqsatynda qolǵa alynǵan konkýrs bıyl ekinshi márte uıymdastyrylyp otyr», - delingen baspasóz qyzmeti taratqan málimette.
