Mańǵystaýlyqtardyń basym bóligi qylmyskerlerge jaza qoldanýdyń qatań sharalaryn quptaıdy - Ó.Shókeev
ASTANA. 20 jeltoqsan. QazAqparat /Marlan Jıembaı/ - Mańǵystaýlyqtardyń basym bóligi qylmyskerlerge jaza qoldanýdyń qatań sharalaryn quptaıdy.
Bul týraly búgin Úkimet otyrysynda Aqtaýdan tikeleı beıne baılanysqa shyqqan QR Premer-Mınıstriniń birinshi orynbasary Ómirzaq Shókeev málim etti.
Onyń aıtýynsha, qala halqymen keri baılanys ornatylyp, shamamen 300 adam qatysqan úlken jıyn ótken. Onda Úkimet pen bılik tarapynan qabyldanyp jatqan sharalardy túsindirý jáne nasıhattaý boıynsha negizgi mindetter naqtylanǵan. Sonymen qatar qalanyń eńbek ardagerlerimen, qurmetti aqsaqaldarymen, «Ózenmunaıgaz» ben «Qarajambasmunaıgaz» kompanııalarynyń jumystan shyǵarylǵan jumysshylarymen kezdesýler uıymdastyrylǵan.
«Biz ereýilge shyqqan munaıshylarmen Aqtaý qalasynyń ortalyq alańynda kezdestik. Bizben kezdeskenderdiń basym kópshiligi buzaqylyq pen adam ólimine kináli tulǵalardyń zańsyz is-áreketterin túbegeıli aıyptaıtyndyǵyn basa aıtqym keledi. Sonymen qatar, qylmyskerlerdi jazalaýǵa qatań sharalardy quptaıdy», - dedi ol.
