Mańǵystaýlyqtar eldiń soltústigine nege kóship jatyr
AQTAÝ. QazAqparat - Mańǵystaý oblysynda elimizdiń soltústik óńirlerine qonys aýdarýshylar úshin 156 kvota bólindi, dep habarlaıdy QazAqparat.
Óńirde ótken jyly bastalǵan «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda 70-ten astam adam ózge óńirlerge qonys aýdarǵan.
Bıyl soltústik óńirlerdegi 27 jumys berýshi bilim berý, densaýlyq saqtaý, memlekettik basqarý, aýylsharýashylyq jáne qurylys salalary boıynsha 2430 bos jumys ornyn usynyp otyr.
Aqtaýda osy máselege qatysty jármeńkeni oblys ákiminiń orynbasary Sholpan Іlmuhanbetova ashyp berdi. Ol halyqty eńbek kúshi jetispeıtin respýblıkamyzdyń soltústik óńirlerine halyqty qonystandyrý óte mańyzdy qadam ekenin atap ótti.
«2017 jyly Mańǵystaýdan elimizdiń soltústigine 21 otbasy, ıaǵnı 77 adam qonys aýdarǵan. Bul turǵyndar ázir jumyspen jáne turǵyn úımen tolyqtaı qamtylǵan», - deıdi oblys ákiminiń orynbasary. 
Munaıly eldiń turǵyndarynyń kópshiligi Soltústik Qazaqstan, Qostanaı, Pavlodar jáne Shyǵys Qazaqstanǵa kóshken. Bul jobanyń basty maqsaty - eńbek kúshi az aımaqtyń suranysyn qanaǵattandyrý. Al, mańǵystaýlyqtar bolsa turaqty jumys jáne turǵyn úıge qoljetkizýdi qalaıdy. Atalǵan óńirdiń túrli mekemeleri aımaqqa kelip, bos oryndar jármeńkesin ótkizdi. Oǵan 100-ge jýyq turǵyndar keldi. 
«Pavlodar oblysy Ýspen aýdanynan kelgen mamandar bilim salasy boıynsha 18, densaýlyq boıynsha 15 jumys ornyn usyndy. Buǵan deıin aýdanǵa Munaılydan 2 otbasy qonys aýdardy. Olarǵa úı satyp alyp berildi»,- deıdi Pavlodar oblysy Ýspen aýdany ákiminiń orynbasary Elmıra Dúısepova.
Onyń aıtýyna qaraǵanda, ¤aýylsharýashylyǵy salasynda kásibin ashamyn deýshilerge jer berilip, mal alýǵa kómek kórsetiletin bolady.
