Mańǵystaýlyqtar Birlik kúni merekesin keńinen atap ótti
AQTAÝ. QazAqparat - Mańǵystaý oblysynda 1 mamyr - Birlik kúni keń aýqymda atalyp ótti. El birligin nyǵaıtýǵa baǵyttalǵan keshendi sharalar sáýir aıynan bastaldy. Merekelik sharalar dúbirli kontsertter, sherýler, kórmeler, jármeńkeler men sporttyq saıystarǵa ulasty, dep habarlaıdy QazAqparat tilshisi.
Shahardyń barlyq aýmaǵynda túrli merekelik sharalar josparlanǵan. «Otanymyz - ortaq úıimiz» atty ólke shyǵarmashylyq ujymdarynyń merekelik kontsertteri, etnomádenı birlestikterdiń ulttyq qolóner buıymdarynyń kórmesi, qala kásipkerleriniń merekelik jármeńkesi men túrli sporttyq sharalar ótti (qazaq kúresi, asyq atý, arqan tartý, gir kóterý, qol kúresi, toǵyzqumalaq, darts, shahmat jáne t.b.). Al Qashaǵan eskertkishinen «Astana» alańyna deıin qala kásiporyndary men mekemeleri eńbek ujymdarynyń sherýi uıymdastyryldy. Atalǵan sharaǵa Mańǵystaý oblysynyń ákimi Eraly Toǵjanov qatysyp, turǵyndardy birlik kúnimen quttyqtady.
«Barshańyzdy 1 Mamyr - Qazaqstan halqynyń birligi kúni merekesimen shyn júrekten quttyqtaımyn! Bul - beıbitshilik pen dostyqtyń, birlik pen berekeniń, yrys pen yntymaqtyń belgisin aıshyqtaıtyn mereıli meıram. Kúni keshe ǵana Astanada ótken Qazaqstan halqy Assambleıasynyń HHVІ sessııasynda Elbasymyz Nursultan Ábishuly Nazarbaev: «Bes áleýmettik bastama - qoǵamnyń áleýmettik birliginiń tuǵyry» dep atap ótti. Bul «Bes bastama eldiń ál-aýqatyn jaqsartýmen birge, ultty uıystyra túsýdiń taǵy bir qyry - áleýmettik birlikti nyǵaıtýǵa baǵyttalǵany» sózsiz.
Birinshiden, elimizdegi ekonomıkany damytýǵa, respýblıkanyń barlyq turǵyndarynyń ál-aýqatyn arttyrý. Óńirdegi halyqtyń ıgiligine arnap jasalyp jatqan barlyq áleýmettik, mádenı jáne sport nysandaryn salý. Biz búginniń ózinde, mereke qarsańynda oblysymyzda birqatar mańyzdy nysandar boı kótergendigin atap ótken artyq emes dep esepteımin (Quryq eldi mekenindegi sý tuşytý zaýytynyń jobasy usynyldy; Munaıly aýdanynda kún sáýlesinen elektr qýatyn alatyn stantsııanyń ashylýy).
Ekinshiden, Áleýmettik kapıtalǵa salynatyn ınvestıtsııa kólemin arttyrý. Búginde bizdiń oblysymyzda bul baǵytta atqarylyp jatyrǵan jumystar az emes. Bir ǵana dálel ınvestıtsııa kólemi ótken jylmen salystyrǵanda 80,2 paıyzdan 101 paıyzǵa kóterildi. Byltyr kásipkerlikti qoldaý kartasynyń aıasynda óńirimizde 5 joba iske qosyldy (jalpy quny 70,7 mlrd teńgeni quraıtyn 419 jumys orny ashyldy). Bıyl 2018 jyly taǵy bes jobany iske qosý josparda», - dedi Mańǵystaý oblysynyń ákimi Eraly Toǵjanov.
Sondaı-aq, tennıs ortalyǵynda Erqosaı batyrdyń qurmetine dzıýdodan halyqaralyq týrnır ótti. Merekelik tartýlar M.Óskinbaev atyndaǵy oblystyq fılarmonııanyń kontserttik baǵdarlamasymen jalǵasty. Sonymen qatar, qala saıabaqtary men alańdarynda fleshmobtar jáne ártúrli formatta sharalar ótti.
