Mańǵystaýlyqtar bir kúndik jalaqylaryn Arys turǵyndaryna aýdarýda
«Qazirgi tańda «Nur Otan» partııasy MO fılıaly janynan Arys qalasyna gýmanıtarlyq kómek kórsetetin jumysshy toby quryldy. Onyń quramynda oblystyq, qalalyq, aýdandyq fılıaldyń qyzmetkerleri bar», - deıdi «Nur Otan» partııasy MO fılıaly tóraǵasynyń birinshi orynbasary Elýbaı Ábilov.
Sondaı-aq, Mańǵystaý oblystyq kásipkerler palatasynyń qyzmetkerleri bir kúndik jalaqylaryn Arystaǵy jarylystan zardap shekken turǵyndarǵa kómek retinde aýdardy. Medıtsına qyzmetkerleri men oblystyq telearna ujymy da qarajat jiberdi.
Qıyn sátte qalǵan otandastarymyzǵa qoldaý kórsetý azamattyq boryshymyz - deıdi kásipkerler palatasynyń dırektory Nurbek Qarasaev. Kásipkerler de qol ushyn sozýǵa ázir. Aqshalaı jáne materıaldyq turǵyda turmysqa qajettilerin jibermek.
«Osy kesheden beri ujym bolyp aqyldasyp, osyǵan bir atsalysýdyń úlesi retinde ózimizdiń bir kúndik jalaqymyzdy kómek retinde aýdarýǵa sheshim qabyldadyq. Ol endi shamamen aıtqanda, óńirlik kásipkerler palatasy, sodan soń fılıaldarymyzdyń qyzmetkerleri barlyǵy bir aýyzdan osyndaı qoldaý kórsetemiz dep sheshim qabyldady. Odan basqa, osy jergilikti kásipkerler, bizdiń kásipkerler keńesiniń músheleri ózderiniń kómekterin kórsetetin bolady. Barlyq Mańǵystaýlyq kásipkerlerdi jáne ujymdardy kómek kórsetýge shaqyramyn»,- deıdi MO "Atameken" ulttyq kásipkerler palatasynyń dırektory Nurbek Qarasaev.
Al, óńirdegi medıtsına qyzmetkerleri, ıaǵnı oblystyq aýrýhana, densaýlyq saqtaý basqarmasy men uıymdary da bir kúndik jalaqylaryn jiberdi.
«Arystaǵy jaǵdaı bárimizdiń qabyrǵamyzdy qaıystyrdy. Sondyqtan aq halattylar bir kúndik jalaqylaryn aýdarýǵa sheshim qabyldady. Mysaly, bir Quryqtaǵy aýrýhanadan 500 myńnan astam qarajat jiberiledi. Keıbir mamandar budan bólek, taǵy qarajatty qaıyrymdylyqqa aýdarýda»,- deıdi MO Densaýlyq saqtaý basqarmasynyń baspasóz hatshysy Azamat Sársenbaev.
Sonymen qatar, telearna mamandary da 300 myńǵa jýyq qarajat aýdardy.
