Mańǵystaýlyqtar aqyly joldarda júk kólikterine abonement engizýdi usyndy

NUR-SULTAN. QazAqparat - Mańǵystaýlyqtar aqyly joldarda júk kólikterine abonement engizýdi usyndy. Bul bastama Mańǵystaý oblysynyń ortalyǵy Aqtaý qalasynda, Beıneý, Qaraqııa, Mańǵystaý jáne Munaıly aýdandarynda ótken «Aqtaý-Beıneý» jol ýchaskesinde aqyly júıeni engizý máseleleri boıynsha qoǵamdyq tyńdaýda aıtyldy, dep habarlaıdy «QazAvtoJol» UK» AQ baspasóz qyzmeti.

Mańǵystaý oblysynyń ereksheligi, óńirdiń ekonomıkasy kólik tasymalymen tyǵyz baılanysty. Sondyqtan aqyly avtojoldar boıynsha óńirde ótken barlyq qoǵamdyq tyńdaýlarda jıi kóterilgen máseleleriniń biri júk kólikterine jeńildikter qarastyrý boldy. Atap aıtqanda, turǵyndar oblys ishinde aýyr avtokólikterdiń júrýi úshin qoljetimdi jyldyq abonementterdi qarastyrýdy surady.

Sondaı-aq, ár aýdanda jergilikti turǵyndar aqyly joldardyń boıynda, olardyń tehnıkalyq sanattarǵa jatatyndyǵyna qaramastan, júrgizýshilerdi úı-janýarlarynan qorǵaıtyn qorshaýlardy ornatýdy, sondaı-aq mal ótkelderiniń sanyn arttyrýdy, arnaıy eskertý belgilerin jáne janýarlardyń jolǵa shyǵýy múmkin jerlerde jaryqtandyrý ornatýdy surady. Belgili bolǵandaı, aımaqta túnde iri qara maldyń jol ústine shyǵyp ketýi óte jıi kezdesedi.

«QazAvtoJol» UK» AQ Mańǵystaý fılıaly dırektorynyń orynbasary Qajymurat Sýıebaev qazirgi ýaqytta Aqtaý men Jetibaı aýyly arasynda maldan qorshaý ornatylǵanyn, sondaı-aq mal ótkelderinde jaryqtandyrý baǵanalaryn ornatý qarastyrylǵanyn habarlady. Onyń aıtýynsha, osyndaı sharalar Jetibaı men Shetpe arasyndaǵy ýchaskede de josparlanyp otyr.

Mańǵystaý oblysynda ótken qoǵamdyq tyńdaýlarǵa jergilikti turǵyndardyń barlyq suraqtary men usynystary hattamaǵa engizilip, sheshim qabyldaý úshin ulttyq kompanııa basshylyǵyna tapsyrylady.