Mańǵystaýlyq jýrnalıster áskerı teńizshilerdiń ómirimen tanysty

AQTAÝ.QazAqparat - Mańǵystaýlyq jýrnalıster áskerı teńizshilerdiń bir kúnimen tanysty. Baspasóz týry QR Áskerı-teńiz kúshteriniń qurylǵanyna 30 jyl tolýyna oraı uıymdastyryldy, dep habarlaıdy QazAqparat tilshisi.

Mańǵystaýdaǵy Buqaralyq aqparat quraldarynyń ókilderi bir kún boıy áskerı teńizshilerdiń qasynda boldy.

Olar teńiz áskerleriniń ómirimen tanysty. Sondaı-aq ártektá kemeler dıvızıonyna baryp matrostarmen, ofıtserlermen kezdesti. Ásker qataryndaǵy teńizshilerdiń jaǵdaıyn kórdi.

Keme komandırleri qonaqtardy jaýyngerlik kemelermen tanystyryp, jatyn jerlerin, as úıin, ofıtserler men matrostardyń kaıýtalaryn, mashınalardyń bólmesin kórsetti. Áskerı teńizshiler qonaqtarǵa túski as berýdi de umytpady.

Odan soń ártekti kemeler dıvızıony elementterin pysyqtaı otyryp, kemelerdi ornalastyrý pýnktin kúzetý jáne qorǵaý boıynsha quramanyń bazalyq jattyǵýyn kórdi. Kemelerdiń sý astyna qarsy-dıversııalyq qorǵanysyn uıymdastyrý, shahıd-qaıyqtar men shahıd-drondardyń shabýylyna toıtarys berýdi uıymdastyrý, ómirsheńdik úshin kúresti uıymdastyrý, órtke qarsy kúres, shartty jaýdyń soqqylarynyń saldaryn joıý áreketterimen tanysty.

«Men oblystyq telearnanyń jýrnalısimin. Arnamyzda áskerılerdiń ómiri, áskerı-teńiz kúshteriniń jumysyn kórsetýge arnalǵan habar bar. Men júrgizýshi retinde únemi áskerılerdiń janynda bolyp, túsirilim jasaımyn. Búgin de birqatar qyzyqty jaıtqa tap boldyq. Kemelerdegi matrostardyń tamaqtary jaqsy. Áskerı daıyndyqtary da joǵary deńgeıde. Olar symbatty, ózderine senimdi. Baıqaǵanym, teńizshiler ózderiniń osy qyzmetterin maqtanyshpen aıtady»,- dedi «Mańǵystaý» telearnasynyń tilshisi Aıjan Sábıtqyzy.

Aıta ketsek, Áskerı-teńiz kúshteriniń qurylǵanyna 30 jyl tolýyna oraı 2 sáýirde M.Óskenbaev atyndaǵy Mańǵystaý oblystyq fılarmonııasynda kontsert ótedi dep josparlanǵan.