Mańǵystaýlyq jastardyń áleýmettik jobalaryna 321 mln teńge qaıtarymsyz qarjy bólindi
Áleýmettik jobaǵa turmysy tómen otbasynan shyqqan 14-29 jas aralyǵyndaǵy jastar, jumyssyz jastar, arnaıy bilim almaǵan, tabysy tómen jastar qatysty.
«Zhas Project» jobasy respýblıka kóleminde 2017 jyldan beri júzege asýda. Bıyl Batys Qazaqstan, Atyraý, Mańǵystaý, Aqmola oblystary men Astana, Almaty qalalarynda júzege asyrylyp otyr.
Bıyl joba úshin respýblıka boıynsha 1 100 grant bólinip, áleýmettik startap jobasyn júzege asyrýǵa (ár joba úshin) 1 mln. teńge kóleminde qaıtarymsyz qarjy qaraldy.
Jobany tanystyrý maqsatynda Mańǵystaý oblysynda 30-ǵa jýyq kezdesý ótip, oǵan 2 myńnan asa jas qatysty. Nátıjesinde, 15 naýryz ben 15 sáýir aralyǵyna deıin zhasproject.kz saıtynda 1264 ótinish qabyldandy.
Qabyldanǵan jobalar úsh kezeńdik irikteýden ótti. Birinshi, tehnıkalyq irikteýde qujattar tekserilip, 758 joba ekinshi týrǵa jiberilgen bolatyn. Ekinshi týrda komıssııalyq baǵalaýdan 704 joba ótip, kompıýterlik irikteý úshinshi kezeńine ótti. Sońǵy kezeńde Mańǵystaý oblysy 321 grant utyp, respýblıka boıynsha eń kóp grant utqan óńir retinde tirkeldi.
Máselen Aqtaý qalasy - 31, Jańaózen qalasy - 87, Mańǵystaý aýdany - 52, Beıneý aýdany - 42, Munaıly aýdany - 47, Túpqaraǵan aýdany - 25, Qaraqııa aýdany - 37 áleýmettik grantty jeńip aldy.
Osylaısha Mańǵystaýlyq jastardyń áleýmettik jobalaryn qarjylandyrýǵa 321 mln teńge kóleminde qaıtarymsyz ınvestıtsııa berilip otyr.
