Mańǵystaýlyq usha almaı qalǵan aqqýdy qutqaryp qaldy
ASTANA. QazAqparat - Mańǵystaý oblysynyń turǵyny Quralbek Ábdikárimov usha almaı júrgen aqqýdy úıine kirgizip, budan keıin jergilikti ınspektsııaǵa habar bergen. Bul týraly QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat.
«2018 jylǵy 28 qańtarda Mańǵystaý oblysy Aqshuqyr selosy baǵytyndaǵy Aqtaý-Aeroport tas joly mańyndaǵy jeke sharýashylyqtyń shopany Quralbek Ábdikárimov usha almaı qalǵan aqqýdy taýyp alyp, úıinde ustap otyrǵandyǵy týraly Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasyna habar bergen. Inspektsııa qyzmetkerleri dereý kórsetilgen mekenjaıǵa baryp, aqqýǵa barlyq kómek kórsetildi», - dep jazady Sáken Dildahmet.
Quralbek Ábdikárimovtyń aıtýy boıynsha, aqqý úıdiń mańyna kelip, ushpaı júrgen.
«Aqqýdy úı mańyndaǵy ıtterden qorǵaý maqsatynda úıge kirgizip, nan berip, sosyn quzyrly organdarǵa habarlasqan. Inspektsııa qyzmetkerleri aqqýdy tolyq tekserip shyqty. Aqqý jaraqat almaǵan. Biraz álsiregeni baıqaldy», - deıdi Sáken Dildahmet.
Inspektsııa qyzmetkerleri aqqýdy Aqtaý qalasy mańyndaǵy «Qaraqııa-Qarakól» qaýmalyndaǵy Qarakól kóline jiberdi. Bul kólde qazirgi tańda 300-ge jýyq aqqý mekendeıdi.
