Mańǵystaýlyq turǵyn ıt júgirtip, qus salady

AQTAÝ. QazAqparat - Mańǵystaýlyq qusbegi Ertis Eşanov Tuşybek aýylyndaǵy mektepte syzý pániniń muǵalimi. Jastaıynan qıyn da qyzyqty qusbegilik ónerge kózin qanyqtyryp, tanymyn shyńdap otyrǵan. Búginde mektep oqýshylaryn qyran baptap, ańǵa salýǵa baýlyp júr.

«Qashyqtan jumysqa kóshkeli qol qýsyryp otyrǵym kelmeıdi. Úıde otyratyn ýaqytym da az. Eń aldymen qyran qusymdy baptaımyn. Qustarymnyń bireýiniń minezi aýyr. Eki búrkit, bes-alty ıtelgim bar. Shákirtterimmen taýǵa shyǵyp, qyrandarymdy ańǵa salamyn. Qolym bosaǵanda sýret salyp, ámııan tigemin. Búrkittiń tomaǵasyn, er azamattarǵa arnalǵan taza bylǵarydan belbeý, qol sómke, ámııan tigemin», - deıdi ol.

Jigitke jeti óner de az demekshi E.Eşanov Almaty qalasynan arnaıy bylǵary terilerin aldyrtyp, er adamdarǵa arnalǵan qol sómke men ámııan tigýdi de qolǵa alǵan. Tipti qylqalamnyń boıaýyn sóıletip, portret salady.

«Ámııan tigýdiń de erekshe syry bar. Áýeli bylǵaryny daıyndap, jan-jaǵyn tegisteımin. Óıtkeni terini keskende jibi tarqatylyp ketedi. Jipteri shyǵyp turmas úshin tegistep, keıin arnaıy quralmen birkelki etip tesip, qalyń arnaıy jippen tigip shyǵamyn. Ámııannyń bylǵarysy bólek, búrkittiń tomaǵasyn tigetin bylǵary bólek bolyp keledi. Bul bylǵaryny arnaıy tapsyryspen aldyrtamyn», - deıdi sheber.

Ertis Eşanovtyń jumys bólmesinde birneshe maıly boıaý sýretter de bar. «Bozjyra», «Sherqala» taýy, Mańǵystaýdyń tarıhı ólkeleri, keń daladaǵy qazaq úıleri beınelegen portretter de kezdesedi. Qylqalamnyń ushymen jylqyny beınelep jatqan óner ıesiniń boıynan qazaqtyń sal serileriniń minezi baıqalady.