Mańǵystaýlyq sportshy qyz Álem chempıonatynan júldeli oraldy
AQTAÝ. QazAqparat - Mańǵystaýdyń sport tarıhynda tuńǵysh ret áıelder arasynda jekpe-jekten álem chempıonatynan jerlesimiz júldeli oraldy, dep habarlaıdy QazAqparat tilshisi.
Zınaıda Beloýsova - «Jas batyr» sport mektebiniń túlegi. 5 jyldan beri jekpe-jekpen aınalysyp, aýyz toltyryp aıtarlyqtaı jetistikterge jetken. Segiz ret respýblıka chempıonatynda joǵary nátıje kórsetip, 17 jasynda Eýropa júldegeri atandy.
Kúni keshe Reseıdiń Sankt-Peterbýrg qalasynda ótken álem chempıonatynda jeńis tuǵyrynan kórine bildi. 37 memleket, 200 sportshy qatysqan baıraqty básekede Iran, Belarýs, Ózbekstan sportshylarymen beldesip, 3-orynǵa taban tiredi. Osylaısha, Qazaqstan komandalyq esepte ekinshi orynǵa shyqty.
Zınaıda qazir Berlındegi álem kýbogyna qatysýǵa belsendi daıyndalyp jatyr. Aıta keteıik, mundaı jetistikke jetýge «Jas batyr» mektebiniń jattyqtyrýshylarynyń eren eńbegi men sport janashyrlarynyń qoldaýy sep boldy.
«Ózbek qyzy myqty bolyp shyqty. Al Belarýs qyzyn aıqyn basymdyqpen jeńdim. Osylaı 3-oryn aldym. Jalpy, ózimniń jibergen qatelikterimdi ańǵaryp, qazir sonymen jumys jasap júrmin. Alda - Álem kýbogy. Bolashaqta sporttaǵy mansabymdy jalǵastyramyn. Anama jáne qaı jarysta bolsyn, qasymnan tabylatyn jattyqtyrýshyma rahmet aıtamyn»,-deıdi Zınaıda Beloýsova.
