Mańǵystaýlyq sheneýnikter gaz máselesiniń qashan sheshiletinin aıtty

AQTAÝ. QazAqparat - Mańǵystaýda birneshe kúnnen beri oblystaǵy gaz quıý beketteriniń birinde suıyq otyn bolmasa, endi birinde uzyn-sonar kezek, dep habarlaıdy QazAqparat tilshisi.

Júrgizýshiler saǵattap kezek kútkenimen endi jete bergende otyn taýsylyp qalady. Demalys kúnderi halyqty sergeldeńge salǵan gaz máselesi búginde de kún tártibinen túsken joq.

Suıyq otynnyń tapshylyǵyna baılanysty Mańǵystaý oblysy ákimdiginiń baspasóz qyzmeti resmı aqparat taratty.

«Jalpy, Mańǵystaý oblysynyń suıytylǵan munaı gazyna aı saıynǵy suranysy 19 myń tonna. Onyń 14 500 tonnasy «Qazaq gaz óńdeý» zaýytynan jiberiledi. Qalǵany Atyraý munaı óńdeý zaýytynan jetkizilýi tıis edi. Atalǵan zaýyt naýryzdyń sońyna deıin jóndeý jumystaryna jabylyp, kólik otynynyń Mańǵystaýǵa tasymaldanýy ýaqytsha toqtatyldy. Osyǵan oraı elimizdiń Energetıka mınıstrligi «SNPS-Aqtóbemunaıgaz» AQ-nan qosymsha 504 tonna suıytylǵan gaz bóldi. Bul suıytylǵan gaz aldaǵy 2-3 kúnde óńirge keledi»,- delingen baspasóz habarlamasynda.

Qajettilikti ótep, qalyptasqan máseleni sheshý úshin oblys ákimi shuǵyl sheshim qabyldady. «Qazaq gaz óńdeý» zaýytynan naýryz aıynyń sońǵy kúnderi beriletin gazdy beri jyljytyp, búgin-erteń gaz quıý beketterine jiberiledi. Sheneýnikter bul - máseleni tolyq sheshýge múmkindik beretinine senim bildirdi.