Mańǵystaýlyq sheber Bolatbek Salaev: Músin óneri tózimdilikke úıretedi

AQTAÝ. QazAqparat - Mańǵystaý oblysy Beıneý aýdanynyń týmasy, talantty músinshi Bolatbek Salaev sheberlikpen ádiptelgen týyndylarymen óz shyǵarmashylyǵyn shyńdaı júr, dep habarlaıdy QazAqparat tilshisi.

Elimizde músin jasaý óneri óristep, aýyl, qala kelbetine kórik bergen sáýlet týyndylarynyń sany artyp keledi. Sheberlik pen tózimdi, tabandy eńbekti talap etetetin óner túrin kásip etken músinshiler halyq arasynda zor qurmetke ıe. Solardyń biri- Bolatbek Salaev.

Búginde Bolatbek Salaevtiń jasaǵan músinderi elimizdiń túkpir-túkpirinde, atap aıtsaq Astana, Almaty, Atyraý, Oral, Qostanaı, Óskemen, Taraz, Aqtaý, Petropavl syndy qalalarda ornalasqan. «Úsh bı», «Alpamys batyr», «Abaı», «Qadyr Myrza Álı», «Dına Nurpeıisova», «Qajymuqan» syndy jeke tulǵalardyń músinderimen qatar, parktik músinder, kompozıtsııalardyń avtory.

Ásirese Bolatbektiń «Anaǵa taǵzym» eskertkishi halyq arasynda tanymal. Ananyń balaǵa degen mahabbatyn, halyqtyń anaǵa degen qurmetin beınelegen músin búginde Mańǵystaý oblysy Beıneý aýdanynda, Taraz, Qyzylorda qalalarynda boı kótergen. Músinshiniń týyndylary shet memleketterde de bar. Atap aıtqanda, Tatarstan memleketinde Bolatbek qolynan shyqqan «Taıqazan» músini qoıylǵan.

Bolatbek Salaev 1991 jyly Mańǵystaý oblysy Beıneý aýdanynda dúnıege kelgen. Ónerge jaqyn, shyǵarmashyl jandardyń tárbıesin kórip ósken ol músinshilik joldy tańdap, Almaty qalasyndaǵy kórkemsýret ýchılışesine oqýǵa túsedi. Bilimin jetildirý maqsatynda Astana qalasyndaǵy Qazaq ulttyq óner ýnıversıtetinde oqyp, músin mamandyǵy boıynsha magıstr dárejesin ıelenedi.

On saýsaǵynan óner tamǵan sheber ár týyndy erekshe shyǵarmashylyq izdenisti qajet etetindigin aıtady. Búginde ol Astana qalasynda olımpıada jeńimpazy, boksshy Bekzat Sattarhanovtyń músinin somdaý ústinde.

Aıta keteıik, Bolatbek jaqynda ǵana Aqtaýda 15 shaǵyn aýdandaǵy teńiz jaǵalaýynda ashylǵan «Qudyqshylar» arhıtektýralyq músinin de jasaǵan.