Mańǵystaýlyq samboshylar Azııa chempıony atandy

AQTAÝ. QazAqparat - Mańǵystaýlyq samboshylar Azııa chempıonatynan júldeli oraldy. Úndistannyń Nıý-Delı qalasynda ótken jastar arasyndaǵy chempıonatta Dáýren Tólegenov - altyn , Nurbek Qýanyshuly - kúmis medalge qol jetkizdi, dep habarlaıdy QazAqparat tilshisi.

Dúbirli dodada 21 elden 300-den astam samboshy baq synaǵan.

Azııa chempıony atanǵan Dáýren Tólegenov birinshilikte 56 kelide kúresken. Ol Japonııa, Koreıa, Bangladesh jáne tájik sportshylaryn tize búktirip, fınalǵa joldama alady. Al, fınalda ózbek balýanyn 5-2 esebimen jeńip, Úndistan astanasynda el abyroıyn asqaqtatty.

«Fınaldaǵy beldesý ońaı tımedi, barlyǵy jaqsy daıyndyqpen kelgen. Eń qıyny sol boldy. Bul birinshi ret qatysýym. Endi aldaǵy álem chempıonatynda jaqsy nátıje kórsetem degen oıdamyn»,-deıdi sambodan azııa chempıony Dáýren Tólegenov.

Al 70 kelide jarysqa shyqqan Nurbek Qýanyshuly Qyrǵyzstan, Pákistan, Tájikstan elderiniń balýandarynan basym túsip aqtyq beldesýde ózbek balýanyna ese jibergen. Alǵash ret iri jarysta baq synaǵan balýan bul júldeniń de ońaılyqpen kelmegenin aıtady.

Úndistanda ótken Azııa chempıonatyna Qazaqstan quramasy sapynda 30 sportshy baq synady. Onyń ekeýi - Mańǵystaý sambo mektebiniń ókilderi. Nátıjesi - jeńis. Bapkerler de shákirtteriniń ónerine rıza. Endigi meje - álem chempıonaty.

«Jarys joǵary dárejede ótti. Oılaǵan maqsatymyzǵa jettik. Kishkene qatelikter boldy, álem chempıonatynda sol qateliktermen jumys istep, oqý-jattyǵý jıynyna ketemiz»,-deıdi sambodan oblystyń aǵa bapkeri Aıbek Janbolatuly.

Qurlyqtyq básekede júlde alǵan jerlesterimiz endi qazan aıynda Tashkent qalasynda ótetin Álem chempıonatynda el namysyn qorǵaıdy. Al oǵan ázirlikti samboshylarymyz Shymkent qalasynda júrgizbek.