Mańǵystaýlyq samboshy álem chempıony atandy

AQTAÝ. QazAqparat – Tashkent qalasynda jastar men jasóspirimder arasynda ótken sambodan álem chempıonatynda mańǵystaýlyq Dáýren Tólegenov top jardy, dep habarlaıdy QazAqparat tilshisi.

Baıraqty básekede mańǵystaýlyq samboshy, «Jas batyr» sport mektebiniń sportshysy Dáýren Tólegenov 56 kg salmaqta qarsylastarynyń bárin tize búktirip, oq boıy ozyp shyqty.

Sportshy Túrikmenstan, Kolýmbııa, Ázirbaıjan, Ózbekstan sportshylaryn aıqyn basymdyqpen jeńip, álem chempıony ataǵyn jeńip aldy.

«Dáýren Tólegenov - aıtýly dodalarda júlde alyp júrgen, bolashaǵynan zor úmit kúttiretin jas samboshy. 2019 jyly QR chempıony, Azııa chempıony, Álem chempıony atandy. «Jas batyr» sport mektebi ujymynyń qýanyshynda shek joq. Chempıon tárbıeleýde ter tógip, eńbek etip júrgen barsha bapkerlerdi quttyqtaımyn», - deıdi «Jas batyr» sport mektebiniń dırektory Manarbek Bısekenov.