Mańǵystaýlyq polıtseılerge zamanaýı baqylaý quraldary ornatylǵan kólikter tabys etildi
AQTAÝ. QazAqparat - Mańǵystaý oblysynyń polıtsııa qyzmetine 38 sý jańa kólik tabys etildi. Mundaı syılyq Qazaqstan polıtsııasyna 26 jyl tolýyna oraı jasalyp otyr, dep habarlaıdy Qazaqparat tilshisi.
Oblys ákimi Eraly Toǵjanov kiltin saltanatty túrde tabystaǵan kólikter qatarynda 7 ToyotaCorolla, 24 LADA Vesta men Largus markaly avtokólik, 5-kvadrotsıkl, 2-elektromobıl bar. Olar sońǵy tehnologııalarmen jabdyqtalǵan, tipti beınekameralar qoıylǵan.
Kólikke ornatylǵan beınekameralar 360 gradýsqa burylady. 800 metr qashyqtyqta jol erejesin buzǵan kólikti túsirýge qaýqarly. 2 rejimde, kúndiz jáne túnde jasaıdy. Taǵy bir erekshiligi, terezesin tumshalap, qarańǵylatqan kólikti birden baıqap, belgi beredi.
Sonymen qatar, avtomobılderde sandyq tehnologııalar ornatylǵan. Bul hattamany elektrondy toltyrýǵa múmkindik beredi. Aıtalyq, buryn tártip saqshylary jol erejesin buzǵandarǵa hattamany qaǵazǵa toltyrsa, endi onlaında 2 mınýtta jazady. Bul júrgizýshiniń de polıtseıdiń de ýaqytyn únemdeıdi.
«Buryn hattamany 15-20 mınýt toltyrǵan bolsa, ony tirkegenshe bir táýlik júretinbiz. Endi birden elektrondy túrde toltyryp, onlaın bazaǵa tikeleı engiziledi. Bar joǵy 2-3 mınýt ketedi. Tipti, qaǵaz shyǵaratyn prınter de bar. Ákimshilik hattamany birden shyǵaryp, júrgizýshige bir danasyn beremiz», - deıdi oblystyq ІІD Jergilikti polıtsııa qyzmeti basshysy Ulyqbek Myltyqov.
Tipti, JSN nómirińizdi bilý arqyly, 1 mınýtta sizdiń júrgizýshi kýáligińiz bar ma, qandaı jol rejesin buzdyńyz, qansha mólsherde tólenbegen aıyppulyńyz bar ekenin anyqtaıtyn baǵdarlama ornatylǵan planshetter bar. Sondaı-aq, kólikte bort-kompıýterler bar. Bul tehnologııa - joǵalǵan, izdeýde júrgen kólikterdi, memleketik nómiri joq kólikterdi anyqtaıdy.
Al, 4 ýnıversal kóliktiń artqy bóligine arnaıy bos oryn jasalǵan. Osy kólikpen ákimshilik quqyq buzýshy azamattardy ustap, bólimshege aparýǵa múmkindik bar.
«5 kvadrotsıkl teńiz jaǵasyndaǵy qoǵamdyq tártipti saqtaý kúzetine beriledi. Ol adam kóp jınalatyn qumdy jerler men jaǵajaıda qoldanylady. Al, 2 elektromobıl 14-15 shaǵynaýdanda júredi. Bul kólikpen polıtseıler jaǵajaıda qoǵamdyq tártipti buzǵan, ishimdik ishken, buzaqylyq jasaǵan adamdardy ustaıdy», - deıdi Ulyqbek Myltyqov.
Sonymen qatar, japonııalyq kólikter aýdandarǵa beriledi.
«Іshki ister organdary qoǵamdaǵy quqyqtyq tártip pen azamattyq qaýipsizdigin qamtamasyz etetin memleketettik bıliktiń eń mańyzdy qurylymy bolyp tabylady. Elbasy adamdar polıtsııa qyzmetkerlerin ózderiniń qorǵaýshysy retinde tanyp, óz qaýipsizdikterin sezinýge tıis dep kórsetken bolatyn. Bul halyq aldynda adal qyzmet etýge ant bergen qyzmetkerlerge úlken jaýapkershilik júkteıdi», - deıdi Eraly Toǵjanov.
2017 jyldan beri ishki ister organdarynyń qyzmetin qamtamasyz etýge jergilikti bıýdjetten 1,7 mlrd teńge, quqyq qorǵaý júıesin tsıfrlandyrýǵa 200 mln teńge bólingen. Al, memlekettik-jekeshelik áriptestik negizinde 2,1 mlrd teńgege beınekamera alyndy.
Shara sońynda jedel-qımyldaıtyn arnaıy jasaq qyzmetkerleri men ІІD arnaıy maqsattaǵy qyzmeti urys-qımyldaryn kórsetti.
