Mańǵystaýlyq palýan sambodan ótken QR Kýbogynda altyn ıelendi
ASTANA. QazAqparat - Mańǵystaýlyq sportshy Janǵalı Nurdáýletov Semeıde eresekter arasynda sambodan ótken Qazaqstan Kýbogynda jeńiske jetti, dep habarlady sports.kz.
Jarys tórt kúnge sozyldy. Oǵan el aımaqtarynan 250-ge jýyq sportshy qatysty. Mańǵystaý namysyn qorǵaǵandardyń biri, Manarbek Beısekenovtiń shákirti Janǵalı Nurdáýletov 52 keli salmaq dárejesinde óner kórsetti. Fınalda Pavlodar sportshysymen kezdesken ol altyn medal jáne «Qazaqstan Respýblıkasynyń sport sheberi» ataǵyna qol jetkizdi.
Sportshy Qosbulaq aýylynda týǵan, segiz jyldan astam ýaqyttan beri sambomen aınalysady. Janǵalı Nurdáýletov bapker bolyp jumys isteıdi, 30 jas shákirti bar.
Bul saıysta Janǵalı Nurdáýletovpen birge oblys namysyn Álııa Tilepova da qorǵady. Ol qola júldege ıe boldy.
