Mańǵystaýlyq oqýshy teri aýrýlaryn anyqtaıtyn saıt jasady

AQTAÝ. QazAqparat – Mańǵystaýlyq oqýshy Aımurat Jetkizgenov teri aýrýlaryn anyqtaıtyn saıt oılap tapty, dep habarlaıdy QazAqparat tilshisi.

Nazarbaev zııatkerlik mektebinde bilim alyp júrgen Aımurat Jetkizgenov bul saıtty ǵylymı joba aıasynda jasaǵan.

Keıin dárigerdiń keńesimen arnaıy platformaǵa aınaldyrý usynysy túsken.

Portal arqyly bórtpeniń qandaı aýrý ekenin bilýge bolady. Ol úshin jarany sýretke túsirip, saıtqa engizse jetkilikti.

Ondaǵy arnaıy baǵdarlamalyq kod 9 túrli dertti anyqtap bere alady.

Saıt «SkinSaver» dep atalady.

«Medıtsına mamandary qandaı da bir dertti ózi anyqtaı almasa, ne kúmáni bolsa osy saıtqa óziniń naýqasyndaǵy bórtiktiń sýretin engizip, osy saıt arqyly dertti naqtylap, anyqtaýǵa bolady»,- dedi Aımurat Jetkizgenov.

Al, oqýshynyń jetekshisi, ınformatıka páni muǵalimi Aqmaral Almabekova «SkinSaver» saıtyn jasaý arqyly dermatologııa salasyndaǵy derekter bazasyn kóbeıtkenin aıtady.

Osylaısha oqýshy medıtsına qyzmetkerleri men stýdentterge kómek kórsetkisi kelgen.

Denedegi kez kelgen bórtpeni fotosýret arqyly anyqtaýda oqýshylar Python baǵdarlamalaý tilin qoldanǵan.